*

sunnudagur, 20. júní 2021
Innlent 26. apríl 2021 12:35

Seldu í Icelandair og fjárfestu í Play

Lífsverk lífeyrissjóður er ekki lengur á meðal tuttugu stærstu hluthafa Icelandair en er áttundi stærsti hluthafi Play.

Ingvar Haraldsson
Haraldur Guðjónsson

Lífeyrissjóðurinn Lífsverk er ekki lengur meðal tuttugu stærstu hluthafa Icelandair. Félagið var þar til nýlega að finna á lista yfir tuttugu stærstu hluthafa Icelandair með ríflega 300 milljónir hluta sem metnir eru á um í hálfan milljarð króna. 

Lífsverk tók ásamt Birtu lífeyrissjóði og fjölda einkafjárfesta þátt í nýafstöðnu hlutafjárútboði flugfélagsins Play sem hyggst hefja áætlunarflug í sumar. Lífsverk á eftir útboðið 4,28% hlut í Play samkvæmt hluthafalista sem Play birti í síðustu viku og er þar með áttundi stærsti hluthafi Play.

Jón L. Árnason, framkvæmdastjóri Lífsverks segir Lífsverk enn meðal hluthafa í Icelandair þó lífeyrissjóðurinn hafi selt hluta bréfa sinna í flugfélaginu. Þá hafi sala bréfanna ekki verið nein yfirlýsing af hálfu lífeyrissjóðsins.

Lífsverk tók einning þátt í hlutafjárútboði Icelandair í haust og fjárfesti fyrir um 252 milljónir króna, sem samsvarar tæplega 0,3% af eignum samtryggingardeildar. Lífsverk átti ekki teljandi eignarhlut í Icelandair fyrir útboðið samkvæmt því sem fram kom á vef lífeyrissjóðsins. Birta tók hins vegar ekki þátt í hlutafjárútboði Icelandair í haust en fjárfesti fyrir um einn milljarð króna í Play.  

Sjá einnig: Play birtir hluthafalista

Hlutabréfaverð Icelandair, sem birtir uppgjör fyrsta ársfjórðungs á fimmtudaginn, hefur hækkað um 17% frá því á þriðjudaginn, þar af um 5% í dag. Gengi bréfa Icelandair stendur nú í 1,64 krónum á hlut. Á þriðjudaginn hélt ríkisstjórnin blaðamannafund þar sem fram kom að allir Íslendingar 16 ára og eldri ættu að hafa fengið hið minnsta fyrstu bólusetningarsprautu við COVID-19 fyrir 1. júlí næstkomandi.

Tuttugasti stærsti hluthafi Icelandair er nú Lífeyrissjóður Vestmannaeyja sem á 196 milljónir hluta í flugfélaginu sem samsvarar um 0,69% hlut.

Stikkorð: Icelandair Play Lífsverk Birta