*

laugardagur, 20. júlí 2019
Innlent 30. desember 2016 17:51

Seldu kvótann úr landi

Daniel Hannan, Evrópuþingmaður breska Íhaldsflokksins, segir að íslenskar útgerðir gætu, líkt og breskar, selt kvótann úr landi ef Ísland væri í ESB.

Höskuldur Marselíusarson
Aðsend mynd

Daniel Hannan er Evrópuþingmaður breska Íhaldsflokksins en hann hefur í gegnum árin margoft komið hingað til lands ásamt því að vísa óspart á gott gengi Íslands utan Evrópusambandsins í baráttu sinni fyrir útgöngu lands síns úr sambandinu.

Viðskiptablaðið ræddi við hann þar sem hann var staddur á heimili sínu en spurður út í fullyrðingar hörðustu aðildarsinnanna hér á landi um að Ísland geti haldið yfirráðum yfir landhelgi sinni jafnvel þó við myndum ganga í sambandið segir hann Íslendinga ekki geta fengið neinar undanþágur.

„Sameiginleg fiskveiðilöggjöf sambandsins skilgreinir fiskimið sem sameiginlega auðlind, sem allar aðildarþjóðir þess hafi jafnan aðgang að. Þið eruð minna en 0,1% af íbúafjölda sambandsins í kerfi þar sem kosið er um úthlutunina eftir íbúavægi,“ segir Daniel.

„Þetta væri gert smátt og smátt, og byggt í grunninn á skiptingunni frá árinu áður en ég held að það sé engin ástæða til að búast við að íslensk fyrirtæki myndu halda sínum hlut. Ég trúi því að sjónarmiðið í Evrópu yrði, þegar fiskimiðin væru orðin samevrópsk eign, að Ísland nyti of hás hlutfalls sameiginlegu auðlindarinnar, svona ef miðað væri við landafræði þess og íbúafjölda.“

Spurður hvort íslenskir kvótaeigendur munu geta selt kvótann úr landi ef við værum í Evrópusambandinu, þar sem eflaust fengist hærra verð fyrir kvótann á Evrópumarkaði heldur en á hinum lokaða íslenska markaði, svarar hann því játandi.

„Auðvitað gætu þeir þá selt hann til hæstbjóðanda eins og breskir skipsherrar hafa gert. Tveir þriðju hlutar kvótans sem áður var veiddur við norðvesturhluta landsins í kringum Grymsby, er núna veiddur af einum gríðarlega stórum hollenskum frystitogara sem keypti upp allan kvótann,“ segir Daniel sem er mjög bjartsýnn á framtíð Bretlands nú þegar hyllir undir fullt sjálfstæði, þar á meðal í sjávarútvegsmálum.

Ítarlegt viðtal við Daniel Hannan er í Áramótum, tímariti Viðskiptablaðsins. Áskrifendur geta nálgast tímaritið hér. Aðrir geta skráð skráð sig í áskrift á einfaldan hátt hér.