Útgerðarfélagið KG Fiskverkun seldi tæplega 0,5% hlut í Brimi fyrir 790 milljónir króna á þriðjudaginn síðasta, 23. nóvember. Alls seldi félagið 10 milljónir að nafnverði á genginu 79 krónur á hlut. Þetta kemur fram í tilkynningu til Kauphallarinnar.
KG Fiskverkun hefur nú selt í Brimi fyrir 1,5 milljarða króna á síðustu tveimur mánuðum en félagið seldi einnig 10 milljónir að nafnverði á genginu 72,5 krónur þann 1. október síðastliðinn fyrir 725 milljónir króna. KG Fiskverkun er eftir sem áður fimmti stærsti hluthafi Brims, nú með 4% hlut sem er um 6 milljarðar króna að markaðsvirði.
Hjálmar Þór Kristjánsson, sem á 10% hlut í KG fiskverkun, situr í stjórn Brims. Hjálmar Þór er bróðir Guðmundar Kristjánssonar, forstjóra og stærsta hluthafa Brims. Daði og Fannar Hjálmarssynir fara með sitthvorn 45% hlut í KG Fiskverkun, samkvæmt fyrirtækjaskrá.
KG er fiskvinnslu- og útgerðarfyrirtæki í Snæfellsbæ og gerir út línuskipið Tjald SH-270, sem sér að stórum hluta vinnslu félagsins fyrir afla. Félagið stundar veiðar og vinnslu á botnfiski.
Sjá einnig: KG Fiskverkun kaupir Valafell
KG festi nýlega kaup á öllu hlutafé Valafells, útgerðar- og fiskvinnslufyrirtækis í Snæfellsbæ. KG á einnig dótturfélagið Rafn ehf. ásamt því að eiga undir 10% hlut í félögunum Steinasölum og Fiskmarkaði Íslands.
