Sendiráð Bandaríkjanna færði í dag Alþjóðamálastofnun Háskóla Íslands veglega bókagjöf um alþjóðamál.
Þetta er í þriðja sinn sem stofnunin og nemendur taka við bókagjöf frá sendiráðinu. Að þessu sinni er umfjöllunarefnið bandarísku kosningarnar frá fræðilegu sjónarmiði.
Þetta kemur fram í tilkynningu frá Alþjóðamálastofnun.
Þar kemur fram að vorið 2006 gaf sendiráð Bandaríkjanna Alþjóðamálastofnun tæplega tvö hundruð bækur um alþjóðamál, öryggis- og varnarmál. S
íðan hefur verið bætt við nýútkomnum fræðibókum á þessu sviði á hverju hausti. Fræðimenn við Háskóla Íslands velja bækurnar til að þær nýtist sem best við kennslu og rannsóknir við háskólann.
Landsbókasafn-Háskólabókasafn hýsir bókakostinn og er aðgangur að honum öllum leyfður.
Líta má á bókagjöfina sem lið í því að efla Alþjóðamálastofnun Háskóla Íslands sem miðstöð innlendra rannsókna á sviði alþjóðamála, öryggis- og varnarmála en góður bókakostur er undirstaða þess að hægt sé að stunda markvissa rannsókna- og heimildavinnu á þessu sviði.
Bókagjöfin styrkir einnig meistaranám í alþjóðasamskiptum við Háskóla Íslands og þau fjölmörgu námskeið sem boðið er upp á við háskólann um alþjóðamál bæði í grunn- og framhaldsnámi.