*

laugardagur, 24. október 2020
Innlent 11. september 2020 17:05

Setja 8 milljarða í sæstreng til Írlands

Íslenska ríkisstjórnin hefur samþykkt fjármögnun þriðja fjarskiptasæstrengsins til Evrópu. Setja 50 milljónir evra í verkefnið.

Ritstjórn
epa

Ríkisstjórnin hyggst setja 50 milljónir evra, andvirði ríflega 8 milljarða íslenskra króna, í nýjan fjarskiptasæstreng til Írlands, sem yrði þar með þriðji fjarskiptasæstrengurinn milli Íslands og Evrópu, en hann hefur verið nefndur IRIS.

Á ríkisstjórnarfundi í morgun var samþykkt tillaga samgöngu- og sveitarstjórnarráðherra og fjármála- og efnahagsráðherra þess efnis að tryggja fjármögnun nýs fjarskiptasæstrengs milli Íslands og Írlands, að því er segir á vef stjórnarráðsins.

Stefnt er að því að taka nýja strenginn í gagnið fyrir lok árs 2022 og árið 2023 hið síðasta. Farice áætlar stofnkostnað við strenginn um 50 milljónir evra, eða sem samsvarar 8,1 milljarði íslenskra króna. Fyrirvari er um samþykki Alþingis.

Undirbúningur hófst með samningi fjarskiptasjóðs við Farice ehf. í árslok 2018 um fyrsta fasa verkefnisins sem er botnrannsókn og hefur sleitulaust síðan verið unnið skipulega að margvíslegum undirbúningi. Þessi ákvörðun gerir félaginu kleift að ræsa næsta fasa verkefnisins og ljúka samningum við helstu birgja.

„Það er nauðsynlegt að endurnýja kerfið tímanlega þar sem Farice-strengurinn er kominn til ára sinna. Að auki er skjót uppfærsla útlandasambanda jafnvel enn brýnni nú þegar samgöngur í heiminum eru takmarkaðar um ófyrirséðan tíma vegna Covid 19,“ segir Sigurður Ingi Jóhannsson, samgöngu- og sveitarstjórnarráðherra.

Til lengri tíma litið er ennfremur mikilvægt út frá viðskiptasjónarmiðum og samkeppnishæfni, að tryggja fullnægjandi tengingar við umheiminn sem þjónað geta kröfuhörðum og eftirsóknarverðum viðskiptavinum. Betri tengingar við landið styðja jafnframt við nýsköpun, þekkingariðnað og ýmis önnur tækifæri til atvinnu-, menningar- og verðmætasköpunar.

Í stefnu fyrir fjarskipti fyrir tímabilið 2019-2033 sem samþykkt var á Alþingi 2019 kemur fram að þrír virkir fjarskiptasæstrengir skuli tengja Ísland við Evrópu á hverjum tíma. Rökin eru margþætt en öryggissjónarmiðin þó mikilvægust. Jafnframt hefur atvinnulífið lagt þunga áherslu á að nýr fjarskiptasæstrengur verði lagður á næstu árum og að hann verði að fullu fjármagnaður af ríkissjóði.