Haraldur Þorleifsson, hefur ekki slegið slöku við frá því að hann seldi Twitter hönnunarfyrirtæki sitt Ueno í byrjun ársins. Boðað hefur verið til blaðamannafundur klukkan 10.20 á morgun fimmtudag, í tilefni af því að setja á upp 100 rampa í miðborg Reykjavíkur fyrir fólk í hjólastólum á þessu ári í kjölfar söfnunarátaks sem Haraldur setti af stað sem ber yfirskriftina Römpum upp Reykjavík.

Guðni Th. Jóhannesson, forseti Íslands, Katrín Jakobsdóttir, forsætisráðherra og Dagur B. Eggertsson, borgarstjóri taka til máls á blaðamannafundinum ásamt Haraldi.

Haraldur, sem notast sjálfur við hjólastól, sagði í viðtali við Vísi að bæta þyrfti úr þessum málum í Reykjavík. Þá hafði Reykjavíkurborg samþykkt að stofna Aðgengissjóð Reykjavíkurborgar að frumkvæði Haraldar, þar sem greitt yrði allt að 80% kostnaðar rekstraraðila við að koma upp römpum við innganga bygginga. Haraldur og borgin lögðu bæði fram stofnframlag í sjóðinn.

„Stofnaður hefur verið sjóður með aðkomu fjölmargra fyrirtækja og aðila sem mun standa straum af meginkostnaði fyrir þá verslunar- og veitingahúsaeigendur sem taka þátt í verkefninu. Með römpunum verður öllum gert kleift að sækja veitingastaði og verslanir þátttakenda í Reykjavík. Unnið verður í góðu samstarfi við eigendur viðkomandi bygginga og skipulagsyfirvöld en borgin er stofnaðili að verkefninu og mun tryggja góðan framgang þess,“ segir í tilkynningu um verkefnið.

Opnar kaffihús við Tryggvagötu

Haraldur greindi einnig frá því á Twitter í gær að hann ynni að því að stofna kaffihús með litlum kvikmyndasal á jarðhæð Tryggvagötu 11. Félag Haraldar, Unnarstígur ehf., keypti jarðhæðina á 135 milljónir króna í janúar síðastliðnum sem telur tæplega 390 fermetra.

Þá hefur Twitter opnað skrifstofur á Íslandi, þar sem Haraldur mun starfa. Auglýsti hann í vikunni eftir forriturum til starfa fyrir fyrirtækið hér á landi.