*

sunnudagur, 28. nóvember 2021
Innlent 25. mars 2021 14:25

Sex tilnefnd til Nýsköpunarverðlauna

Atmonia, Pure North Recycling, Sidewind, GeoSilica, Laki Power og Icelandic Glacial eru tilnefnd til Nýsköpunarverðlauna Samorku.

Ritstjórn
Aðsend mynd

Sex nýsköpunarfyrirtæki eru tilnefnd til nýrra Nýsköpunarverðlauna Samorku, sem afhend verða á ársfundi samtakanna á morgun, föstudaginn 26. mars. Á ársfundinum verður fjallað um nýsköpun í orku- og veitugeiranum undir yfirskriftinni Sprotar vaxa í frjóum jarðvegi. 

Óskað var eftir tilnefningum um fyrirtæki sem byggja á tæknilausnum fyrir orku- og veitufyrirtæki landsins eða þjónustu við þau, eða að þau nýti orku, heitt vatn, neysluvatn, fráveitu og/eða aðra auðlindastrauma til nýsköpunar. Dómnefnd fagfólks úr orku- og veitugeiranum valdi úr tilnefningum sem bárust. 

Eftirfarandi fyrirtæki eru tilnefnd: 

Atmonia:
Fyrirtækið Atmonia stefnir að því að gera umhverfisvæna ammoníaksframleiðslu mögulega með rafefnafræðilegum aðferðum og sérhæfðum efnahvötum og bjóða þannig upp á kolefnislausa framleiðslu áburðar og eldsneytis.

Pure North Recycling:
Pure North Recycling endurvinnur plast að fullu og aðferðir þess byggjast á íslensku hugviti þar sem jarðvarminn og umhverfisvænir orkugjafar eru í aðalhlutverki.

Sidewind:
Sidewind vinnur að þróun umhverfisvænna lausna fyrir flutningaskip. Fyrirtækið stefnir að framleiðslu vindtúrbína sem komið er fyrir í opnum gámum.

GeoSilica:
Nýsköpunarfyrirtækið Geosilica framleiðir fæðubótarefni úr kísil sem finna má í affallsvatni  jarðvarmavirkjana. Slík nýting var óþekkt annars staðar í heiminum þegar fyrirtækið var stofnað árið 2012 og tæknin til að gera það líka.

Laki Power:
Laki Power var stofnað árið 2015 til að þróa tæknibúnað sem er hengdur upp á háspennulínur og fylgist nákvæmlega með ástandi þeirra. Tæknin gerir fyrirtækjum sem annast flutning og dreifingu raforku kleift að hafa nákvæmt eftirlit með ísingu, eldi og umferð fólks við línurnar í rauntíma.

Icelandic Glacial:
Icelandic Glacial er fyrsta drykkjavörufyrirtækið sem hefur fengið CarbonNeutral® viðurkenningu en öll starfsemi fyrirtækisins er kolefnisjöfnuð. Notað er hreint íslenskt vatn við framleiðsluna og 100% umhverfisvæn orka.