*

föstudagur, 20. september 2019
Innlent 24. apríl 2019 10:14

SGS samþykkti samning með 80% atkvæða

Kjarasamningur Starfsgreinasambandsins og SA hefur verið samþykktur. Kjörsókn var rétt undir 13%.

Ritstjórn
Björn Snæbjörnsson er formaður Starfsgreinasambandsins.
Haraldur Guðjónsson

Niðurstöður atkvæðagreiðslu um nýjan kjarasamning Starfsgreinasambands Íslands og Samtaka atvinnulífsins á hinum almenna vinnumarkaði var sú að  samningurinn var samþykktur með yfirgnæfandi meirihluta.

Starfsgreinasambandið hélt utan um sameiginlega rafræna atkvæðagreiðslu meðal 18 félaga um nýjan samning, en AFL Starfsgreinafélag sá sjálft um sína atkvæðagreiðslu. Atkvæðagreiðslan stóð yfir á tímabilinu 12. til 23. apríl. Í heildina var kjörsókn 12,78%, já sögðu 80,06% en nei sögðu 17,33%. 2,61% tóku ekki afstöðu. Á kjörskrá voru 36.835 manns.

Niðurstöðurnar voru afgerandi í öllum félögunum nema einu, en í 17 af 19 félögum var samningurinn samþykktur með yfir 70% atkvæða. Aldan stéttarfélag í Skagafirði var tæpast, en þar samþykktu 50,0% samninginn, en 48,28% voru á móti. 58 kusu af 520 með atkvæðarétt.

Samningurinn á hinum almenna vinnumarkaði, sem undirritaðir voru 3. apríl síðastliðinn, telst því samþykktur hjá eftirfarandi félögum:

  • AFLi Starfsgreinafélagi,
  • Öldunni stéttarfélagi,
  • Bárunni stéttarfélagi,
  • Drífanda stéttarfélagi,
  • Eflingu stéttarfélagi,
  • Einingu-Iðju,
  • Framsýn stéttarfélagi,
  • Stéttarfélagi Vesturlands,
  • Stéttarfélaginu Samstöðu,
  • Verkalýðsfélagi Akraness,
  • Verkalýðsfélagi Grindavíkur,
  • Verkalýðs- og sjómannafélagi Bolungarvíkur,
  • Verkalýðs- og sjómannafélagi Sandgerðis,
  • Verkalýðsfélagi Snæfellinga,
  • Verkalýðsfélagi Suðurlands,
  • Verkalýðsfélagi Vestfirðinga,
  • Verkalýðsfélagi Þórshafnar,
  • Verkalýðs- og sjómannafélag Keflavíkur og nágrennis
  • Verkalýðsfélaginu Hlíf.