*

sunnudagur, 21. júlí 2019
Innlent 25. júní 2019 16:03

SI leggjast gegn sykurskattinum

Samtökin benda á að tillögur Embættis landlæknis byggi á áratuga gamalli könnun á mataræði Íslendinga.

Ritstjórn
Sigurður Hannesson, framkvæmdastjóri Samtaka iðnaðarins.
Haraldur Guðjónsson

Samtök iðnaðarins leggjast gegn tillögum Embættis landlæknis um að auka skattheimtu á sykraða, ósykraða gosdrykki og sælgæti, sem í daglegu tali er kallaður sykurskatturinn. Benda samtökin á að tillögurnar byggi á könnun sem gerð var á mataræði Íslendinga fyrir áratug. Margt hafi breyst í mataræði landsmanna á þessum tíma. „Markaðshlutdeild sykraðra gosdrykkja hefur stórlega dregist saman á síðustu árum um leið og markaðshlutdeild sykurlausra drykkja og vatns hefur aukist. Þessi þróun er einungis hluti af miklum breytingum á lífsháttum og matarvenjum landsmanna. Neytendur hafa í miklum mæli snúið sér að hollari valkosti. Það er því löngu tímabært að kannað verði að nýju hvernig matarvenjum landsmanna er háttað.“ segir meðal annars í fréttatilkynningu SI.

Þá segja samtökin að sérstök skattlagning einstakra vöruflokka feli í sér mismunun og skerði samkeppnisstöðu þeirrar greinar sem í hlut á.

„Samtök iðnaðarins telja það fráleitt að taka aftur upp vörugjöld á matvæli með tilheyrandi kostnaði. Ekki aðeins hækkar það verð þeirra vara sem fyrir því verða heldur eykur það kostnað við kerfið sem slíkt sem á endanum kemur niður á samkeppnishæfni fyrirtækja og eykur kostnað neytenda og hins opinbera,“ segir jafnframt í tilkynningunni.

Tilkynningu SI má sjá í heild hér að neðan:

Samtök iðnaðarins mótmæla þeim tillögum Embættis landlæknis að auka skattheimtu á sykraða og ósykraða gosdrykki auk sælgætis til að draga úr sykurneyslu landsmanna.

Tillögurnar byggja á könnun sem gerð var á mataræði Íslendinga fyrir áratug. Það er ljóst að margt hefur breyst í mataræði landsmanna á þeim tíma sem liðinn er frá þeirri könnun. Markaðshlutdeild sykraðra gosdrykkja hefur stórlega dregist saman á síðustu árum um leið og markaðshlutdeild sykurlausra drykkja og vatns hefur aukist. Þessi þróun er einungis hluti af miklum breytingum á lífsháttum og matarvenjum landsmanna. Neytendur hafa í miklum mæli snúið sér að hollari valkosti. Það er því löngu tímabært að kannað verði að nýju hvernig matarvenjum landsmanna er háttað.

Sérstök skattlagning einstakra vöruflokka felur í sér mismunun og skerðir samkeppnisstöðu þeirrar greinar sem í hlut á. SI hafa ávallt barist fyrir jafnræði á markaði og að þar ríki almennar og einfaldar reglur. Benda má á að íslensk stjórnvöld hafa reynt hvoru tveggja, sértæka skattheimtu af stökum vöruflokkum og almenna skattlagningu á sykri í matvælum til að stýra neyslu almennings. Hvorugt hefur skilað þeim árangri sem að var stefnt og einungis haft í för með sér umtalsverðan kostnað og óhagræði sem hefur komið niður á bæði fyrirtækjum og almenningi.

Samtök iðnaðarins telja það fráleitt að taka aftur upp vörugjöld á matvæli með tilheyrandi kostnaði. Ekki aðeins hækkar það verð þeirra vara sem fyrir því verða heldur eykur það kostnað við kerfið sem slíkt sem á endanum kemur niður á samkeppnishæfni fyrirtækja og eykur kostnað neytenda og hins opinbera.