Seðlabankinn hyggst selja 60 milljónir evra á gjaldeyrismarkaði í janúar í því skyni að auka dýpt gjaldeyrismarkaðarins og bæta verðmyndun. Þetta kemur fram í frétt á vef bankans .

Salan hefst 4. Janúar og mun nema 3 milljónum evra hvern viðskiptadag. Öll viðskiptin munu fara fram fyrir klukkan 10 að morgni. Bankinn seldi 63 milljónir evra nú í desember, og frá því regluleg sala gjaldeyris hófst um miðjan september hefur hann selt 231 milljón evra.

Tilkynnt verður í lok hvers mánaðar hvernig gjaldeyrissölu komandi mánaðar verður háttað, sem taka muni mið af aðstæðum á markaði hverju sinni, þannig að umfangið verði „í samræmi við eðlilega virkni markaðarins“, eins og segir í fréttinni.

Sú reglulega gjaldeyrissala sem um ræðir er óháð stefnu bankans um inngrip á gjaldeyrismarkaði þegar þess er talið þurfa til að draga úr sveiflum.