*

þriðjudagur, 21. september 2021
Fólk 13. janúar 2021 14:35

Sigríður stýrir fræðslumiðstöð

Sigríður Guðmundsdóttir er nýr framkvæmdastjóri Fræðslumiðstöðvar atvinnulífsins. Tekur við af Sveini Aðalsteinssyni.

Ritstjórn
Sigríður Guðmundsdóttir nýr framkvæmdastjóri Fræðslumiðstöðvar atvinulífsins var áður fræðslu- og mannauðsstjóri Eimskipafélags Íslands.
Aðsend mynd

Sigríður Guðmundsdóttir hefur tekið við starfi framkvæmdastjóra Fræðslumiðstöðvar atvinnulífsins (FA), af Sveini Aðalsteinssyni. Fræðslumiðstöðin er samstarfsvettvangur ASÍ og SA til að bæta menntun.

Sigríður hefur starfað í mannauðs- og fræðslumálum um árabil en hún starfaði áður hjá Eimskip sem fræðslu- og mannauðsstjóri félagsins en einnig sem ráðgjafi hjá Attentus – Mannauður og ráðgjöf. Sigríður hefur lokið MBA námi frá HÍ og er menntuð sem grunnskólakennari frá HA og með Dipl.Ed gráðu í Fræðslustarfi og stjórnun frá HÍ.

Fræðslumiðstöð atvinnulífsins ehf. var stofnuð í desember 2002 af Alþýðusambandi Íslands (ASÍ) og Samtökum atvinnulífsins (SA) með það að markmiði að vera vettvangur um bætta menntun og möguleika fyrir einstaklinga á vinnumarkaði með litla grunnmenntun, innflytjendur og sambærilega hópa.

Verkefni Fræðslumiðstöðvar atvinnulífsins eru að vera leiðandi í að greina, meta og auka hæfni í atvinnulífinu og styðja þannig við þróun starfsmanna til að afla sér menntunar eða bæta stöðu sína. Fræðslumiðstöð atvinnulífsins (FA) er samstarfsvettvangur og verkfærasmiðja í fullorðins-og starfsmenntun á íslenskum vinnumarkaði.

Hlutverk FA er að veita fólki á vinnumarkaði sem ekki hefur lokið prófi frá framhaldsskóla tækifæri til að afla sér menntunar eða bæta stöðu sína. Þessu hlutverki á FA að sinna með því að greina, meta og þróa leiðir og aðferðir til að auka hæfni á vinnumarkaði í samstarfi við atvinnulífið.

FA nýtir sér erlend tengslanet um nám fullorðinna í þróunarvinnu sinni. FA starfar á grundvelli þjónustusamnings við mennta- og menningarmálaráðuneytið um verkefni á sviði framhaldsfræðslu.