*

fimmtudagur, 22. ágúst 2019
Fólk 16. maí 2019 09:48

Sigurþór nýr framkvæmdastjóri SVFR

Sigurþór Gunnlaugsson, viðskiptafræðingur, hefur verið ráðinn framkvæmdastjóri SVFR.

Ritstjórn
Aðsend mynd

Sigurþór Gunnlaugsson, viðskiptafræðingur, hefur verið ráðinn framkvæmdastjóri SVFR. Starfið var auglýst laust til umsóknar fyrir nokkrum misserum, þegar ljóst var að Ari Hermóður Jafetsson ætlaði að láta af störfum með vorinu. Á fimmta tug umsókna bárust um starfið og í hópi umsækjenda voru margir hæfir kandidatar. SVFR greinir frá þessu á vef sínum.

Sigurþór er viðskiptafræðimenntaður og með MBA gráðu frá Háskólanum í Reykjavík. Hann hefur mikla reynslu af rekstri, verkferla- og fjárhagsáætlanagerð og kostnaðareftirliti. Hann var markaðsstjóri Kringlunnar og síðar stjórnandi hjá Air Atlanta Icelandic, m.a. stöðvarstjóri í Bretlandi, Indlandi og Sádi Arabíu, yfirmaður á flugrekstrarsviði, útstöðva og ferðaþjónustu.

Sigurþór mun hefja störf í næstu viku og segist hlakka mikið til. "SVFR er einhver merkasti félagsskapur landsins, með magnaða sögu og frábær ársvæði á leigu. Ég tek við góðu búi, þar sem búið er að endurnýja samninga um öll lykilsvæði félagsins og við getum einbeitt okkur enn frekar að þjónustu við félagsmenn," er haft eftir Sigurþóri í tilkynningunni.

Jón Þór Ólason, formaður SVFR, er ánægður með að fá Sigurþór til starfa. "Það var ánægjulegt að sjá hve margir sýndu starfinu áhuga, en Sigurþór er réttur maður fyrir félagið á þessum tímapunkti. Hann býr að mikilli rekstrarþekkingu og mun efla skrifstofu félagsins. Við hlökkum til að vinna með honum og bjóðum hann velkominn til starfa."