Hagnaður var af rekstri Símans á öðrum ársfjórðungi sem nemur 618 milljónum króna en á sama tíma á síðasta ári var hagnaður félagsins 83 milljónir. Rekstrarhagnaður (EBIT) nam 1,1 milljarði á öðrum fjórðungi samanborið við 335 milljónir á sama tímabili 2020. Þetta kemur fram í árshlutauppgjöri sem félagið birti eftir lokun Kauphallarinnar.

Orri Hauksson bendir á í tilkynningu samhliða uppgjörinu að bætt afkoma milli ára skýrist meðal annars af sekt af hálfu Samkeppniseftirlitsins á öðrum fjórðungi 2020 vegna pakkatilboðs á enska boltanum ásamt „umtalsverðum uppsagnarkostnaði“ sem kom til á því tímabili. Sé þó leiðrétt fyrir þessum þáttum er áfram jákvæð þróun í öllum undirliggjandi rekstrarþáttum að sögn Orra.

Tekjur fjarskiptafélagsins jukust um 2,2% milli ára og námu 6.352 milljónum á öðrum fjórðungi ársins. Handbært fé frá rekstri nam 2.424 milljónum á öðrum ársfjórðungi en var 2.481 milljónir á sama tímabili 2020.

Orri segir að starfsemi Símans á síðasta ársfjórðungi litast af mörgum aðgerðum sem komu ekki fram nema að hluta í uppgjörstölum og nefnir sem dæmi breyttrar verkaskiptingar innan félagsins og úrvinnslu nýrrar fjármögnunar.

Síminn endurfjármagnaði langtímalán sín á tímabilinu, annars vegar með langtímaláni frá Arion að fjárhæð 6 milljörðum og svo með langtímaláni frá Íslandsbanka að fjárhæð 20 milljörðum auk eins milljarða króna lánalínu. Í lok júní gaf félagið út skammtímavíxla að fjárhæð 1,5 milljörðum.

Eignir félagsins námu 69,6 milljörðum í lok júní. Eigið fé nam 31,1 milljarði og eiginfjárhlutfallið var 44,7%.

Veturinn nýttur til að ljúka stefnumörkun um Mílu

Í fjárfestakynningu Símans segir að uppfærsla og uppbygging Mílu á 5G sendum fyrir Símann gangi í samræmi við áætlanir og verður opnað á almenna umferð á 5G kerfinu í haust. Þegar hafi 12 sendar verið gangsettir á höfuðborgarsvæðinu og stefnt er á að fjórðungur landsmanna geti tengst 5G kerfi fyrirtækisins í lok árs.

Í apríl tilkynnti félagið um að fjárfestingabankann Lazard ásamt Íslandsbanka hafi verið ráðnir til að ráðleggja um framtíðarmöguleikar Mílu sem sjálfstæðs félags, þar á meðal framtíðar eignarhaldi. Orri segir að ekkert hafi enn verið ákveðið í þeim efnum.

„Innlendir og erlendir fjárfestingarsjóðir hafa sýnt félaginu áhuga og verður rætt nánar við valda aðila í framhaldinu. Veturinn verður því nýttur til að ljúka stefnumörkun um félagið.“

Fram kemur að söluandvirði dótturfélagsins Sensa, sem var selt til norska félagsins Crayon Group, hafi verið að fullu greitt á öðrum ársfjórðungi. Endanlegt söluverð nam 3.710 milljónum króna.