Síminn hefur skrifað undir samkomulag við alþjóðlega franska sjóðastýringarfyrirtækið Ardian France SA um einkaviðræður og helstu skilmála í tengslum við mögulega sölu á dótturfélaginu Mílu. Í samkomulaginu felst að áreiðanleikakönnun sé nú þegar lokið, samningagerð langt komin og að fyrirhuguð viðskipti séu að fullu fjármögnuð. Í tilkynningu Símans kemur fram að ef af viðskiptunum verður mun Ardian bjóða íslenskum lífeyrissjóðum aðkomu að kaupunum. Hlutabréf Símans hafa hækkað um 5% í dag.
„Aðilar ætla að vinna við að ljúka samningaviðræðum og skrifa undir skuldbindandi samning eins fljótt og auðið er,“ segir í tilkynningunni. Jafnframt er bent á að í samkomulaginu felst engin skuldbinding eða trygging um að af viðskiptunum verði.
Fréttablaðið greindi frá því í sumar að EBITDA-margfaldarinn við sölu á Mílu yrði að líkindum á bilinu 12 til 15. Út frá EBITDA hagnaði Mílu í ár, sem er áætlaður um 5.150 milljónir, þá gæti söluandvirði Mílu numið á bilinu 60-80 milljörðum króna. Markaðsvirði Símans stóð í 87,5 milljörðum við lokun Kauphallarinnar á föstudaginn.
Ardian er alþjóðlegt sjóðastýringarfyrirtæki með höfuðstöðvar í París, Frakklandi, og skrifstofur víðs vegar um heim. Ardian er lýst sem langtímafjárfesti með um 114 milljarða bandaríkjadala í stýringu og hjá fyrirtækinu starfa yfir 800 manns. Meðal fjárfesta í Ardian eru ríkisstofnanir, lífeyrissjóðir, tryggingafélög og stofnanafjárfestar.
Tekið er fram að ef af kaupunum verður muni Síminn og Ardian vinna með Seðlabankanum að framgangi viðskiptanna þannig að þau hafi sem minnst áhrif á gjaldeyrismarkað. Jafnframt muni fyrirtækin vinna með hinu opinbera að upplýsingagjöf og öryggismálum sem tryggja hagsmuni landsmanna.
Míla er heildsölufyrirtæki á fjarskiptamarkaði og felst kjarnastarfsemi Mílu í að byggja upp og reka innviði fjarskipta á landsvísu. Síminn greindi frá því í apríl að fjárfestingabankann Lazard og Íslandsbanka hafi verið ráðnir til að ráðleggja um framtíðarmöguleikar Mílu sem sjálfstætt félag, þar á meðal um eignarhald félagsins.
