Fjöldi farsímanotenda sem eru í viðskiptum við Nova hefur þrefaldast á einu ári. Um mitt ár 2008 voru þeir 13.646 en í lok júní 2009 voru viðskiptavinir Nova orðnir 46.269 talsins. Fyrirtækið hefur nú 13,9 prósent markaðshlutdeild en hafði 4,2 prósent hlutdeild í fyrra.
Þetta kemur fram í nýrri tölfræðiskýrslu Póst- og fjarskiptastofnunar sem birt var í dag.
Siminn og Vodafone tapa miklu
Síminn er með 48,1 prósent allra farsímanotenda á Íslandi í viðskiptum hjá sér samkvæmt skýrslunni. Það er í fyrsta sinn sem fyrirtækið er með minna en helmingsmarkaðshlutdeild á farsímamarkaði.
Fyrir áratug var Síminn með um 80 prósent markaðshlutdeild á farsímamarkaði.Viðskiptavinum fyrirtækisins hefur fækkað um rúmlega 24 þúsund á einu ári. Þeir voru þó 160.512 talsins um mitt þetta ár og Síminn er sem áður langstærsti leikandinn á farsímamarkaði.
Ljóst er að minni símafyrirtækin tvö, Nova og Tal, eru að höggva veruleg skörð í viðskiptavinahóp þeirra tveggja stærri því að Vodafone tapar líka um tíu þúsund viðskiptavinum milli ára á meðan að Tal bætir við sig tæplega níu þúsund viðskiptavinum.
Farsímanotendur 2008 til 2009:
Fjöldi viðskiptavina Markaðshlutdeild
Fyrirtæki júní 08 júní 09 júní 08 júní09
Síminn 184.861 160.512 56,6% 48,1%
Vodafone 118.813 108.820 36,4% 32,6%
Nova 13.646 46.269 4,2% 13,9%
Tal 9.382 18.000 2,9% 5,4%
Samtals 326.708 333.601 100% 100%
