Athafnamaðurinn Sigmar Vilhjálmsson hefur fest kaup á helmingshlut í Hlöllabátum. Sigmar greinir frá þessu á Facebook og vísar í frétt Fréttablaðsins um málið.

„Hlöllabátar voru settir á laggirnar af sál og ástríðu sem hefur haldist alla tíð. Hlöllabátar eru nákvæmlega það sem þeir eru, þeir eru ekkert að þykjast og það eru engir stælar í þeim. Þeir eru bara ekta, alltaf eins og al íslenskir,“ segir Sigmar.

Gæði, hraði og gott verð hafa einkennt staðina og mun mín aðkoma ekki breyta neinu í þeim efnum. Hlöllabátar við Ingólfstorg og á Selfossi eru ekki hluti af félaginu, þeir eru sjálfstæðir staðir sem hafa leyfi til að nota nafnið, þeir eru því ekki hluti af þessum kaupum, en vörumerkið er það,“ bætir hann við.

Sigmar segir tækifæri á að efla starfsemi félagsins rekstrarlega, markaðslega og sóknarlega. Hlöllabátar passi inn á svo marga staði og eigi mikið inni í staðsetningum víða um land.