Fjármálaeftirlitið hefur sent dreifibréf til allra lífeyrissjóða þar sem ítrekað er að sjóðfélagar sem ráðstafa hluta í séreignasjóð ráði sjálfir í hvaða séreignasjóð það verður. Fjármálaeftirlitið birti frétt þess efnis inn á heimasíðu sinni í gær.
Bréfið er sent út í tilefni breytinga sem urðu á lífeyriskerfinu frá og með síðustu mánaðamótum þegar framlag atvinnurekenda hækkaði um 1,5% upp í 10% af launum og launþegum bauðst að setja allt að 2% af launum í svokallaða tilgreinda séreign.
Frá þessu var greint í fjölmiðlum fyrr í vikunni en í frétt eftirlitsins segir að vegna villandi fréttaflutnings og upplýsinga á heimasíðum lífeyrissjóða hafi Fjármálaeftirlitið ákveðið að senda lífeyrissjóðum dreifibréf þar sem ítrekað er að þeir sjóðfélagar sem ráðstafa hluta í séreignasjóð ráði sjálfir í hvaða séreignasjóð það verður.