Skaðabótarmál slitastjórnar Glitnis gegn Jóni Ásgeir Jóhannessyni og átta stjórnendum Glitnis banka hefur verið fellt niður. Slitastjórnin taldi ákvörðun stjórnenda Glitnis að veita Baugi 15 milljarða lán hafa valdið Glitni 6,5 milljarða tjóni. Baugur notaði andvirði lánsins til að taka þátt í hlutafjárútboði FL Group.
Gerð hefur verið sátt í málinu og munu aðilar bera sinn málskostnað sjálfir. Einn málsaðila ætlar þó að láta reyna á málskostnaðinn. Glitnir ákvað að láta málið falla niður vegna þess að Sérstakur saksóknari hefur fellt niður mál sama efnis niður.
Slitastjórn Glitnir höfðaði málið gegn Jóni Ásgeiri Jóhannessyni, fyrrverandi forstjóra Baugs, Lárusi Welding, fyrrverandi forstjóra Glitnis, og fyrrverandi stjórn Glitnis. Í henni sátu Þorsteinn Jónsson, stjórnarformaður og stjórnarmaður í FL Group, Jón Sigurðsson, forstjóri FL Group, Skarphéðinn Berg Steinarsson, fyrrverandi stjórnarformaður FL Group, Pétur Guðmundarson, fyrrverandi lögmaður hjá Logos, Björn Ingi Sveinsson, fyrrverandi forstjóri Saxbygg, Haukur Guðjónsson og Katrín Pétursdóttir, forstjóri Lýsis. Stjórnin var sjálfkjörin en framboðsfrestur rann út 25 apríl 2007.
Málið hafði verið sett á dagskrá héraðsdóms eftir áramótin.