*

föstudagur, 10. júlí 2020
Innlent 8. maí 2020 15:18

Skapa 3400 sumarstörf fyrir námsmenn

Félags- og barnamálaráðherra hefur ákveðið að verja um 2,2 milljörðum í að fjölga tímabundnum störfum fyrir námsmenn í sumar.

Ritstjórn
Ásmundur Einar Daðason.
Haraldur Guðjónsson

Ásmundur Einar Daðason, félags- og barnamálaráðherra, hefur ákveðið, í samræmi við tillögu ríkisstjórnar Íslands, að verja um 2.200 milljónum króna í átaksverkefni til að fjölga tímabundnum störfum fyrir námsmenn í sumar. Markmiðið er að með átakinu verði til 3.400 tímabundin störf fyrir námsmenn, 18 ára og eldri, á milli anna sem skiptast á milli opinberra stofnana og sveitarfélaga. Um er að ræða 4,5 sinnum stærra átak en ráðist var í eftir hrunið árið 2008. Þetta kemur fram í fréttatilkynningu frá félagsmálaráðuneytinu.

„Átakið er unnið í  samvinnu við stofnanir ríkisins og sveitarfélög og er vinna þegar hafin við undirbúning. Öll sveitafélög munu skila inn tillögum til Vinnumálastofnunar og í framhaldinu verða öll störfin auglýst. Undirbúningi verður lokið á næstu vikum þannig að unnt verði að auglýsa störfin opinberlega fyrir 26. maí næstkomandi.  Stofnanir og sveitarfélög þurfa að skapa ný störf í tengslum við átakið. Ráðningartími námsmanna er að hámarki tveir mánuðir og miðað er við tímabilið frá 1. júní til 31. ágúst,“ segir í tilkynningunni.

„Við erum að setja aukinn kraft í atvinnuúræði fyrir námsmenn sem munu standa frammi fyrir erfiðleikum við að finna fá vinnu í sumar vegna þess óvissuástands sem nú ríkir vegna COVID-19 faraldursins. Þessar aðgerðir eru hluti af félagslegum aðgerðapakka sem er ætlað að veita mótvægi vegna þeirra áhrifa sem faraldurinn hefur á ýmsa hópa í samfélaginu," er haft eftir Ásmundi Einari Daðasyni, félags-og barnamálaráðherra, í tilkynningunni.