Sértækir skattar sem lagðir hafa verið á íslensk fjármálafyrirtæki á undanförnum árum auka kostnað og ýta undir vaxtamun á bankamarkaði sem um nemur 0,4 prósentustigum.

Þetta kom fram í máli Ásdísar Kristjánsdóttur, forstöðumanns greiningarsviðs Samtaka atvinnulífsins (SA) á Skattadegi Deloitte í morgun.

Samkvæmt útreikningum greiningarsviðs SA þá væri vaxtamunur íslenska bankakerfisins sá sami og hjá sambærilegum bönkum á Norðurlöndum ef að þessir sértæku skattar væru ekki lagðir á.

Ásdís sagði vaxtamun íslenskra banka vera nú um 2,7% en væri um 2,3% ef áhrifa þessara sértæku skatta gætti ekki. til lengri tíma litið munu þessar álögur koma fram í hærri vaxtamun og þjónustugjöldum sem viðskiptavinir bera.