Samkeppniseftirlitið (SKE) hefur heimilað kaup Orkla ASA á 80% eignarhlut í Nóa Síríusi hf. Frá árinu 2019 hefur Orkla átt 20% hlut í Nóa Siríusi og eignast því 100% hlut í félaginu eftir yfirtökuna. Þetta kemur fram í tilkynningu frá SKE .
Fyrr í mánuðinum var greint frá því að Norska fyrirtækið Orkla hefði komist að samkomulagi um kaup á öllu hlutafé í Nóa Síríus . Orkla er leiðandi fyrirtæki á neytendavörumarkaði á Norðurlöndunum og selur vörur sínar hér á landi í gegnum heildsala, dreifingaraðila eða beint til smásölukeðja. Vörumerki Orkla sem seld eru hér á landi telja meðal annars Kims, Göteborgs kex, Panda, OWL og Havrefras.
Umsvif Orkla á Íslandi eru töluverð en félagið á eignarhlut í danska félaginu Dragsbæk A/S sem á meirihluta hlutafjár í Kjarnavörum ehf. sem framleiðir meðal annars smjörlíki, sultur og sósur. Félagið á einnig eignarhlut í Bluma FOOD I/S, sem á hlut í Gæðabkastri ehf. og Visku hf.
Eina skörun fyrirtækjanna að mati SKE var í dreifingu og sölu á sælgæti og snakki hér á landi. Var það mat SKE við rannsókn málsins að samruninn myndi ekki styrkja eða leiða til markaðsráðandi stöðu Orkla hér á landi. Þá var ekki heldur talið að samkeppni myndi raskast með umtalsverðum hætti og því hefur heimild fengist fyrir samrunanum frá SKE.
