Skeljungur hefur fest kaup á þjónustumiðstöðinni Baulunni í Borgarfirði, sem liggur við Þjóðveg 1 á leiðinni norður í land, skömmu áður en kemur að afleggjaranum upp Bröttubrekkurnar þar sem þjóðvegurinn til Vestfjarða liggur um. Í kaupunum felast allur fasteignar- og lóðarréttur ásamt verslunarrekstri á svæðinu þar sem verslunin er til húsa.
Fyrirhugað er að bensínstöð Orkunnar opni á svæðinu á komandi mánuðum og rekstur veitingasölunnar verði efldur. Á Baulunni, sem heitir eftir samnefndu og einkennandi gráu fjalli sem gnæfir yfir Borgarfirðinum, hefur löngum verið rekin olíusala frá Olís, nú ÓB.
Skeljungur var löngum með þjónustustöð í Borgarnesi í kappi við Hyrnuna sem er með eldsneyti frá N1, en Olís hafði þá einungis bensínstöð í Brákey, en opnaði nýja þjónustustöð við Brúartorgið árið 1998.
Skeljungur byggði svo nýja þjónustustöð á gömlu lóð sinni við Brúartorgið við brúna yfir Borgarfjörðinn árið 2011, en þá var reksturinn undir vörumerkinu Stöðin sem nú er ekki lengur í notkun. Árið 2015 tók Grillhúsið við rekstri í húsinu og síðan þá hefur Skeljungur ekki haft þjónustumiðstöð í Borgarfirðinum, sem horfir nú til breytinga.
Árni Pétur Jónsson, forstjóri Skeljungs segir:
„Við erum full tilhlökkunar að taka við rekstri hinnar víðfrægu Baulu í Borgarfirði. Er þetta áframhaldandi skref í að framfylgja stefnu okkar um að þétta stöðvanetið og efla þjónustuna enn betur við íbúa landsbyggðarinnar.“
