*

fimmtudagur, 2. desember 2021
Innlent 4. febrúar 2021 18:07

Skeljungur og Norvik stærst í Wedo

Norvik eignast 25% í Wedo, eiganda Heimkaupa, eftir 1,3 milljarða hlutafjáraukningu. Hjalti Baldursson er nýr stjórnarformaður.

Ingvar Haraldsson
Guðmundur Magnason, framkvæmdastjóri Wedo.
Gígja Einarsdóttir

Norvik, fjárfestingafélag Jóns Helga Guðmundssonar, er orðið stærsti hluthafi Wedo, eiganda Heimkaupa, ásamt Skeljungi. Félögin eiga hvort um sig fjórðungshlut í Wedo eftir ríflega 1,3 milljarða króna hlutafjáraukningu í félaginu.

Líkt og Viðskiptablaðið fjallaði um í desember keypti hluthafahópur undir forystu Hjalta Baldurssonar, stofnanda Bókunar, 40% hlut í Wedo, í desember. Hjalti er nú orðinn stjórnarformaður félagsins.

Núverandi hluthafar höfðu tækifæri út janúar til að ákveða hvort þeir tækju þátt í hlutafjáraukningunni. Skeljungur, sem var stærsti hluthafinn fyrir hlutafjáraukninguna með þriðjungshlut, tók þátt og lagði Wedo til 227 milljónir króna í janúar að því er fram kemur í uppgjöri félagsins sem birt var í dag. 

Markmið hlutafjáraukningarinnar var að styrkja frekari vöxt félagsins. Í viðtali við Frjálsa verslun í desember sagði Guðmundur Magnason, framkvæmdastjóri Wedo, að heimsfaraldurinn hefði fært netverslun hér á landi fram um þrjú ár.

Norvik er meðal annars eigandi Byko og timburframleiðenda víða um Evrópu.

Stikkorð: Skeljungur Norvik Wedo Heimkaup