*

laugardagur, 14. desember 2019
Fólk 16. júlí 2019 14:50

Skipulagsbreytingar á Fréttablaðinu

Ingibjörg Pálmadóttir hættir sem framkvæmdastjóri og verður stjórnarformaður Fréttablaðsins.

Ritstjórn
Skrifstofur Torgs eru við Hafnartorg.
Haraldur Guðjónsson

Skipulagsbreytingar hafa verið gerðar hjá Torgi, útgáfufélagi Fréttablaðsins. Jóhanna Helga Viðarsdóttir verður framkvæmdastjóri félagsins í stað Ingibjargar Stefaníu Pálmadóttur sem verður stjórnarformaður félagsins. Í stjórninni með Ingibjörgu verður Helgi Magnússon, sem keypti í byrjun júní 50% hlut í Fréttablaðinu Skömmu fyrir kaupin var Davíð Stefánsson ráðinn ritstjóri Fréttablaðsins.

Einnig var greint frá því í dag að Gústaf Bjarnason verði auglýsingastjóri félagsins og Kristín Björg Árnadóttir verði fjármálastjóri félagsins. Samkvæmt upplýsingum á vef Fréttablaðsins hefur Jóhanna Helga Viðarsdóttir starfað hjá Torgi og áður 365 miðlum frá árinu 2016. Á árunum 2014-16 veitti hún forstöðu verkefnastofu hjá Reiknistofu bankanna. Áður var hún hjá Símanum eða frá árinu 2004 í hinum ýmsu störfum, en lengst af sem verkefnastjóri. Jóhanna lauk MBA-gráðu við Háskóla Íslands vorið 2017 og diploma í verkefnastjórnun og leiðtogahæfni frá Endurmenntun Háskóla Íslands árið 2010.

Kristín Björg hefur undanfarin ár starfað við ýmis fjármálatengd verkefni, nú síðast hjá Skaganum 3X á Akranesi. Þar áður starfaði hún á fjármálasviði endurskoðunarfélagsins Deloitte og sem fjármálastjóri hjá Fiskmarkaði Íslands. Kristín Björg útskrifaðist sem markaðshagfræðingur árið 2004 frá Vitus Bering í Danmörku.

Gústaf hefur starfað hjá félaginu frá árinu 2015 sem verkefnastjóri á auglýsingadeild Fréttablaðsins. Á árunum 2006-2012 starfaði hann á söludeild Bylgjunnar hjá 365 miðlum ehf. með stuttu hléi á meðan hann var búsettur erlendis og sinnti öðrum sjálfstæðum verkefnum. Gústaf, sem útskrifaðist frá Kennaraháskóla Íslands árið 2004, hefur víðtæka þekkingu og reynslu af auglýsinga- og markaðsmálum.

Hlutafé Torgs var aukið um 300 milljónir í lok síðasta árs líkt og Viðskiptablaðið greindi frá í síðustu viku. Það er annað árið í röð sem hlutafé er aukið en í árslok 2017 var það aukið um 150 milljónir. Fyrri hlutafjárhækkunin var greidd með eignum sem 365 miðlar hf., eigandi Torgs, lögðu í félagið.

Stikkorð: Torg Fréttablaðið