Skráðum fyrirtækjum í Bandaríkjunum hefur fækkað verulega á undanförnum árum. Árið 1996 voru 7.322 fyrirtæki skráð, en þeim hefur fækkað all verulega. Í dag eru einungis um 3.700 fyrirtæki skráð í kauphöllum vestanhafs. Þetta kemur fram á síðu Bloomberg Business Review.
Sum fyrirtæki hafa verið afskráð þar sem þau ná ekki að standast kröfur eftirlitsaðila. Kostnaður og flækjustig koma of til sögu þegar rekja á ástæðu afskráninga. Tölfræðin virðist þó ekki styðja þær röksemdarfærslur. Megin ástæðan eru samrunar og yfirtökur skráðra fyrirtækja, en mörg met voru slegin frá árinu 1997 til 2012 í þeim geira.
Nýskráningum hefur einnig fækkað til muna. Ef markaðir í Bandaríkjunum og Evrópu eru bornir saman, má sjá að frá árinu 1996 til 2012 fækkaði nýskráningum um 49% í Bandaríkjunum, á meðan þeim fjölgaði um 28% á öðrum mörkuðum.
Almennt hefur fyrirtækjum þó fjölgað frá árinu 1996. Ný félög virðast einfaldlega eiga auðveldara með að sækja sér fjármagn til fjárfestingarsjóða sem sérhæfa sig í fjárfestingum á nýjum og óskráðum fyrirtækjum.
