Íbúðaskuldir hafa lækkað úr 72% í 65% af vergri landsframleiðslu frá gildistöku skuldaniðurfærslunnar. Á slíkum mælikvarða eru þær nú jafnar því sem þær voru árið 2004. Þetta kemur fram í frétt á vef fjármálaráðuneytisins .
Þar segir að skuldastaða heimilanna hafi batnað umtalsvert á undanförnum misserum. Ástæðan sé einkum ákjósanlegar efnahagslegar aðstæður og stöðugleiki sem leitt hafi til talsverðrar kaupmáttaraukningar hjá almenningi. Kaupmáttur hafi aukist um 8% frá ársbyrjun 2013, sem hafi hjálpað til við að greiða niður skuldir.
„Frá áramótum er búið að greiða liðlega 51 ma. kr. vegna höfuðstólslækkunarinnar, það eru 75% af heildarfjárhæð niðurfærslunnar. Síðasti fjórðungur hennar verður greiddur inn á höfuðstól lána í ársbyrjun 2016. Við þetta bætast verulegar fjárhæðir sem heimilin geta greitt inn á húsnæðislán sín, eða sparað til fyrstu kaupa, skattfrjálst í hverjum mánuði,“ segir í fréttinni.
Þá kemur einnig fram að skuldir heimila hafi lækkað mun hraðar hér en í flestum nágrannalöndum okkar á undanförnum árum. Um mitt ár 2009 hafi hlutfall skulda heimilanna verið 126% af vergri landsframleiðslu. Þá hafi Danmörk aðeins verið með hærra skuldahlutfall af þeim löndum sem Ísland sé gjarnan borið saman við, og eru Bretland, Danmörk, Noregur, Írland, Svíþjóð, Sviss og Kýpur nefnd í því samhengi. Síðan þá hafi skuldahlutfallið lækkað um 38% og af þessum löndum hafi aðeins Írland náð svipuðum árangri.
