*

fimmtudagur, 29. júlí 2021
Innlent 2. febrúar 2018 12:39

Söfnun áls í sprittkertum heldur áfram

Átak um söfnun áls í sprittkertum verður að varanlegum kosti í flokkun og endurvinnslu hér á landi.

Ritstjórn
Frá móttöku áls í sprittkertum á Sorpu Sævarhöfða, en tekið er á móti álinu í sprittkertum á hátt í 90 endurvinnslustöðvum um allt land.
Aðsend mynd

Jákvæð viðbrögð almennings urðu við endurvinnsluátaki áls í sprittkertum yfir hátíðirnar og hefur verið ákveðið að halda átakinu áfram segir í fréttatilkynningu frá Samál. Yfirskrift átaksins sem stóð yfir í desember og janúar var „Gefum jólaljósum lengra líf“, en nú hefur verið ákveðið að gera söfnun álsins að varanlegum kosti í flokkun og endurvinnslu hér á landi.

Tilgangurinn með átakinu var að efla vitund þjóðarinnar um mikilvægi þess að flokka og endurvinna það ál sem fellur til hjá heimilum og fyrirtækjum. Að átakinu standa Endurvinnslan, Fura, Gámaþjónustan, Grænir skátar, Íslenska gámafélagið, Málmsteypan Hella, Plastiðjan Bjarg, Samtök iðnaðarins, Samál og Sorpa.

Almenningi stendur því áfram til boða að skila álinu í sprittkertum á um 90 endurvinnslu- og móttökustöðvar um allt land á vegum Endurvinnslunnar, Gámaþjónustunnar, Íslenska gámafélagsins og Sorpu segir í fréttatilkynningu.

Einnig má skila því í um 120 dósagáma Grænna skáta á höfuðborgarsvæðinu. Loks má setja álbikarana eins og aðra málma sem til falla á heimilum í grænar tunnur Íslenska gámafélagsins og endurvinnslutunnur Gámaþjónustunnar. Tekið er á móti kertavaxi hjá Plastiðjunni Bjargi – iðjuþjálfun og Öldunni Borgarnesi og ný kerti unnin úr því.

Um 700 álbikarar duga í eina pönnukökupönnu

Innan fárra vika skýrist betur hversu mikið af áli safnaðist í átakinu, en tíma tekur að safna því öllu á einn stað. Ljóst er að afraksturinn dugar í ófáar íslenskar pönnukökupönnur, en í eina slíka þarf um 700 sprittkerti. 

lt ál sem safnast hérlendis fer til endurvinnslu, en á næstu vikum ræðst hvað verður um álið sem safnaðist í átakinu. Kosturinn við endurvinnslu áls er að það má endurvinna aftur og aftur án þess að það tapi upprunalegum gæðum. 

Þar sem til þess þarf einungis 5% af orkunni sem fór í að framleiða það upphaflega, þá skapast við það mikil verðmæti fyrir endurvinnsluiðnaðinn í heiminum. Þá dregur endurvinnsla áls verulega úr losun gróðurhúsalofttegunda, en í álframleiðslu verður almennt mest losun við orkuvinnsluna. Nánar má lesa um málið á vef Samál.

Stikkorð: Samál söfnun álbikarar