*

mánudagur, 27. september 2021
Erlent 23. júlí 2021 15:40

Sögðu fötin veita vörn gegn COVID-19

Ástrálskt fatamerki hefur verið sektað um 453 milljónir króna vegna staðhæfinga um að föt þess veittu vörn gegn veirunni.

Ritstjórn
Lorna Jane er vinsælt ástralskt vörumerki.
Aðsend mynd

Ástralskur framleiðandi íþróttafatnaðar hefur verið sektaður um 3,6 milljónir dollara, um 453 milljónir króna, vegna fullyrðinga um að föt sín veittu vörn gegn COVID-19 og spornaði gegn smitum. Guardian greinir frá.

Framleiðandinn, Lorna Jane, sagði föt sín spreyjuð með efni sem veitti fullkomna vörn gegn COVID-19 og öðrum sjúkdómsvaldandi veirum og bakteríum.

Meðal þess sem var notað í auglýsingaherferðum fyrirtækisins var: „Lækningin gegn dreifingu COVID-19? Það heldur Lorna Jane.“

Alríkisdómstóll Ástralíu sagði fyrirtækið notfæra sér ótta og áhyggjur neytenda til þess að selja vörur sínar. Þá var jafnframt sagt að ekkert væri til í staðhæfingum fyrirtækisins um að efnið veitti vörn gegn COVID-19. 

Stikkorð: Covid-19 Lorna Jane