Þórhildur Sunna Ævarsdóttir, þingmaður Pírata segir það rangt að flokkurinn hafi verið búinn að gefa eftir öll sín helstu stefnumál í viðræðunum við Framsókn og hina vinstriflokkana sem upp úr slitnaði í byrjun vikunnar.
Eins og Viðskiptablaðið fjallaði um segir þingmaður Framsóknarflokksins hvort tveggja Pírata sem og Samfylkinguna hafa verið búin að gefa upp öll sín stefnumál í viðræðunum í von um að fá sæti í ríkisstjórn.
Þetta segir Þórhildur Sunna, sem ásamt Smára McCarthy voru fulltrúar Pírata í viðræðunum, vera alrangt. „Sögur af uppgjöf Pírata eru uppspuni frá rótum,“ segir Þórhildur Sunna á facebook síðu sinni.
„Við vorum vissulega lausnamiðuð og samvinnuþýð í þessum samningaviðræðum enda byggja gildi Pírata á vönduðum vinnubrögðum og gagnkvæmri virðingu en því skal haldið rækilega til haga að þessar viðræður strönduðu ekki á málefnum.
Við höfðum náð góðri sátt um okkar helstu mál og er stjórnarskráin þar með talin líkt og kom fram á sameiginlegum blaðamannafundi formannanna fjögurra (og formannsígilda) þegar viðræðum var slitið.“
