Sony hefur keypt 250 milljóna dollara hlut í tölvuleikjaframleiðandanum Epic sem er þekktast fyrir leikinn Fortnite. Hlutur Sony mun nema um 1,4% í Epic, sem er þó ekki nægilega mikið til að tryggja japanska tæknifyrirtækinu einkadreifingarrétt á leikjum Epic.

Samningurinn kemur í kjölfar vinsælla sýndartónleika rapparans Travis Scott í Fortnite í apríl en um 12,3 milljónir manns horfðu á tónleikana í beinni.

Fjárfesting japanska tæknifyrirtækisins kemur frá samstæðunni en ekki Playstation-deild hennar, samkvæmt David Gibson, greinanda Astris Advisory Japan. Hann telur það vera merki um að Sony vilji koma tónlist, myndum og öðru efni sínu inn í Fortnite heiminn.

„Ef þú ert Sony, viltu ekki að listamenn þínir verði þeir fyrstu til að komast inn í sýndarheim Fortnite fram yfir Warner og aðra samkeppnisaðila?“ hefur Financial Times eftir Gibson. „Ef 250 milljónir dollara gefa þeim það tækifæri, þá er þetta taktísk rétt skref hjá Sony.“