Sparisjóður Mýrasýslu hafði ekki aflað ársreikninga eða fjárhagslegra upplýsinga frá stærstu lánþegum sínum, að því er kom fram í úttekt FME árið 2008. Var því bent á nauðsyn þess að yfirfara stöðu þeirra með tilliti til þess hvort þörf væri á viðbótartryggingum. Kemur þetta fram í rannsóknarskýrslu um sparisjóðina, sem kynnt var í dag.
Þá benti eftirlitið á nauðsyn þess að stjórn sparisjóðsins fjallaði um lánveitingar umfram 10% af eiginfjárgrunni. Í svarbréfi sparisjóðsins við drögum að skýrslu Fjármálaeftirlitsins, dagsettu 29. júlí 2008, kom fram að þegar væri hafin vinna við að taka tillit til athugasemda Fjármálaeftirlitsins, og til dæmis væri verið að fara í gegnum útlánaáhættu og stórar áhættuskuldbindingar.
Í skýrslunni kemur jafnframt fram að fjármögnun Sparisjóðs Mýrasýslu, önnur en eigið fé, skar sig nokkuð frá öðrum sparisjóðum, einkum þegar kom fram á síðari hluta þess tímabils sem er til skoðunar í skýrslunni. Hlutfall milli innlána og útlána fór stöðugt lækkandi öll árin, og hjá móðurfélaginu var það komið niður í 50% í árslok 2004. Eftir það voru útlán að meirihluta fjármögnuð með lántökum.
Ytri endurskoðandi sparisjóðsins, KPMG, fór yfir afskriftareikning útlána samkvæmt endurskoðunarskýrslum á árunum 2005–2009. Á hverju ári var sömu athugasemdum komið á framfæri við stjórnendur sparisjóðsins um að vinna bæri skýrslu í tengslum við uppgjör þar sem gerð væri grein fyrir stöðu og þróun afskriftamála og að eftirlit með útlánum, tryggingum og vanskilum þeirra yrði eflt.Í endurskoðunarskýrslu 2008 var bent á að innri endurskoðun hefði ekki verið starfrækt hjá sparisjóðnum á árinu.