*

fimmtudagur, 27. janúar 2022
Innlent 21. desember 2021 19:30

Sprenging í netverslun síðdegis

Velta í netverslun hjá Nettó tvöfaldaðist eftir að tilkynnt var um hertar sóttvarnaraðgerðir í dag, þvert á nýlega þróun.

Júlíus Þór Halldórsson
Gunnar Egill Sigurðsson, framkvæmdastjóri verslunarsviðs Samkaupa, segir netverslun hjá Nettó hafa stóraukist síðdegis í dag eftir að tilkynnt var um hertar sóttvarnaraðgerðir.
Aðsend mynd

„Það er alveg margföldun á eftirspurn í dag og á morgun. Þetta gerðist bara núna eftir hádegi. Dagurinn í dag er orðinn uppseldur og það er komið mikið af pöntunum inn á næstu tvo daga,“ segir Gunnar Egill Sigurðsson, framkvæmdastjóri verslunarsviðs Samkaupa um netverslun hjá Nettó eftir að tilkynnt var um hertar sóttvarnaraðgerðir fyrr í dag.

Hann segir netverslun hjá Nettó hafa verið um það bil tvöföld á við það sem við hafði verið búist. „Við vorum ekkert að undirbúa að það kæmi einhver holskefla, en svo bara núna eftir hádegi þegar þetta var komið í fréttirnar stórjukust hjá okkur pantanirnar og dagurinn í dag seldist upp.“

Ekki í takt við þróun nýverið
„Við erum að undirbúa okkur undir að fjölga afhendingartímabilum fram að jólum. Það er verið að reyna að finna til auka mannskap til að tína og keyra heim. Við keyrum út til 2 á aðfangadag, en eins og þetta lítur út núna ef þetta heldur svona áfram þá verður aðfangadagur örugglega orðinn uppseldur seinnipartinn á morgun.“

Gunnar segir þetta ekki í takt við þróunina síðustu mánuði. Tengslin milli sóttvarnaraðgerða og netverslunar hafi verið búin að veikjast verulega frá því sem áður var í faraldrinum. „Við fundum ekki svona mikla umframeftirspurn þegar það var byrjað að herða aðgerðir núna í október, sem dæmi. Þessar takmarkanir virðast heldur betur vera að ýta við fólki.“

Gunnar segir marga nýta þjónustuna þegar þeir byrja í sóttkví, en auk þess séu líklega margir sem vilji komast hjá smiti og sóttkví yfir hátíðirnar.

Fjallað er um málið í Viðskiptablaðinu sem kemur út á morgun. Áskrifendur geta nálgast blaðið undir Tölublöð, aðrir geta skráð sig í áskrift hér. Meðal annars efnis í blaðinu er:

  • Lilja Dögg Alfreðsdóttir vísar gagnrýni á endurgreiðslukerfi vegna útgáfukostnaðar bóka alfarið á bug.
  • Fjallað um umtalsverðar fjárfestingar erlendra aðila í íslenskum tæknifyrirtækjum árinu.
  • Týr fjallar um vígaferli í borginni.
  • Huginn og muninn eru á sínum stað
  • Rætt er við markaðs- og sölustjóra Parka, sem hefur innreið á leigubílamarkað á nýju ári
  • Nýr verkefnastjóri markaðsmála Langasjávar segir frá nýja starfinu, ferlinum hingað til og nýtilkomnum golfáhuga
  • Nýtt fyrirtæki á raforkumarkaði hyggst bjóða upp á nýjung