Minniháttar sprengja sprakk nú í dag á hóteli í Davos, nálægt fundi leiðtoga heimsins. Þetta kemur fram á vef Reuters.
Vinstrisinnaðir aðgerðasinnar hafa lýst ábyrgð á verknaðnum. Enginn meiddist við sprenginguna.
Einn þeirra sem varð sprengingarinnar var er Devin Wenig forstjóri Thomas Reuters Markets. Wenig segir að hann hafi verið staddur á fundi á hótelinu þegar sprengjan sprakk. Allir viðstaddir hafi verið sannfærðir um að þetta hafi verið sprengja, gólfið lyftist og hálftíma hafi tekið að koma fundarmönnum aftur inn í salinn.
Talsmaður svissnensku lögreglunnar hefur staðfest að sprengja hafi sprungið í kjallara hótelsins. Sprengjan olli minniháttar skemmdum en enginn hafi slasast.
