Garðar Þ. Guðgeirsson
Garðar Þ. Guðgeirsson
© Aðsend mynd (AÐSEND)
Garðar Þ. Guðgeirsson, sem gegnt hefur stöðu framkvæmdastjóra þróunar hjá TM hf., hefur tekið ákvörðun um að láta af störfum hjá félaginu að því er segir í tilkynningu félagsins til kauphallar.

Fyrirtækið hefur tekið þá ákvörðun að samhliða brotthvarfi Garðars verði sú breyting gerð á framkvæmdastjórn TM að staða framkvæmdastjóra þróunar verður lögð niður.

„Garðar hefur verið lykilmaður í þróunarverkefnum TM á undanförnum árum og ég þakka honum kærlega fyrir samstarfið um leið og ég óska honum velfarnaðar í verkefnum á nýjum vettvangi,“ segir Sigurður Viðarsson, forstjóri TM.

Eins og Viðskiptablaðið greindi frá í haust hófu TM viðræður við Kviku banka um sameiningu kauphallarfyrirtækjanna tveggja. Samkvæmt samkomulagi félaganna frá lokum nóvember eignast hluthafar TM meirihlutann í hinu sameinaða félagi sem mun bera nafn Kviku banka, og vera undir yfirstjórn forstjóra Kviku.