Stærsta fiskeldisfyrirtæki heims, Mowi, hefur komist að samkomulagi um kaup á 51,3% hlut í laxeldisfyrirtækinu Arctic Fish, sem rekur eldisstöðvar á Vestfjörðum, fyrir samtals 1,88 milljarða norskra króna eða sem nemur 26,2 milljörðum íslenskra króna.
Norska stórfyrirtækið Mowi mun eiga 51,3% hlut í Arctic Fish á móti 34,2% hlut Síldarvinnslunnar. Síldarvinnslan keypti þriðjungshlut í Arctic Fish í júní síðastliðnum fyrir 1.089 milljónir norskra króna eða um 15 milljarða íslenskra króna. Kaupverð Síldarvinnslunnar miðaði við 100 norskra krónur á hlut.
Arctic Fish Holding AS er skráð á Euronext Growth Market í Osló og á félagið 100% hlutafjár í Arctic Fish ehf. sem er eitt af stærstu laxeldisfyrirtækjum á Íslandi og rekur eldisstöðvar á Vestfjörðum þar sem félagið er með rúmlega 27 þúsund tonna leyfi fyrir eldi í sjó.
Kaupverð Mowi miðar við 115 norskar krónur á hlut í Arctic Fish en gengi félagsins í stóð í 87 norskum krónum við lokun Euronext-kauphallarinnar í dag. Kaupverðið er því 32% yfir núverandi gengi Arctic Fish og 15% yfir kaupverði Síldarvinnslunnar.
Seljandinn er Norway Royal Salmon (NRS). Salan er sögð liður í sáttaviðræðum við framkvæmdastjórn Evrópusambandsins vegna samruna NRS og SalMar, móðurfélags Icelandic Salmon, sem hét áður Arnarlax. Framkvæmdastjórnin gaf grænt ljós á samrunann í dag.
„Íslenska laxeldisiðnaðurinn mun ganga í gegnum mikla þróun og vöxt á komandi árum og við erum hæstánægð að fá tækifæri til að taka þátt. Íslenska hafssvæðið býður upp á frábæra vaxtarmöguleika og lífsskilyrði fyrir laxinn,“ segir Ivan Vindheim, forstjóri Mowi.
Mowi segist hafa fylgst með Arctic Fish í nokkur ár og verið hrifið af því hvernig starfsfólk, stjórnendur og eigendur þess hafi tekist að gera félagið að leiðandi framleiðanda Atlantshafslax á Íslandi.
„Með Mowi í liði með sér eru Arctic Fish og eigendur þess í góðri stöðu til að njóta spennandi vaxtarferðalags með stuðningi verkfærakassa og sterkri fjárhagsstöðu Mowi,“ segir í tilkynningunni. Mowi segir að nærliggjandi sveitarfélög muni njóta góðs af fjárfestingunni.
