*

laugardagur, 16. janúar 2021
Frjáls verslun 24. desember 2020 14:05

Stærstu fyrirtæki heims 6-10

Yfir sjö milljónir manna starfa hjá tíu stærstu fyrirtækjum heims. Samanlögð velta þeirra er hátt í landsframleiðslu Þýskalands.

Ingvar Haraldsson
epa

Alls eru sex af tíu stærstu fyrirtæjum heims asísk, tvö bandarísk og tvö evrópsk þó að starfsemi þeirra flestra teygi sig um heim allan. Yfir sjö milljónir manna starfa hjá fyrirtækjunum tíu og er samanlögð velta þeirra hátt í 500 þúsund milljarðar króna sem samsvarar um það bil landsframleiðslu Þýskalands, fjórða stærsta hagkerfis heimsins. Hér er fjallað um fyrirtæki 6-10 á listanum.

6. Saudi Aramco

Sádi-arabíska ríkisolíufyrirtækið Saudi Aramco er stundum kallað arðbærasta fyrirtæki heims enda nær hvergi jafn ódýrt að bora eftir olíu og í eyðimörkum landsins. Félagið skilar nærri sama hagnaði og hin níu félögin á listanum samanlagt. Félagið var skráð á markað á síðasta ári og var þá verðmætasta skráða fyrirtæki heims. Það missti nafnbótina hins vegar til Apple í sumar enda hefur heimsfaraldurinn leitt af sér hrun olíuverðs sem hefur komið illa við félagið.

  • Velta: 45.800 milljarðar
  • Hagnaður: 12.300 milljarðar
  • Eignir: 55.300 milljarðar
  • Starfsmenn: 79 þúsund

7. Volkswagen  

Þýski bílaframleiðandinn Volkswagen var stofnaður árið 1937 í Þýskalandi Hitlers en er í dag stærsti bílaframleiðandi heims. Innan samstæðunnar eru í dag fjölmörg vörumerki á borð við Audi, Porsche, Lamborghini, Bentley, Bugatti, Scania og Skoda. Félagið hefur átt í vök að verjast síðustu ár eftir að í ljós kom árið 2015 að félagið hafði svindlað á útblástursprófum bíla sinna um margra ára skeið. Málið hefur kostað fyrirtækið yfir 30 milljarða dollara eða yfir 4.000 milljarða íslenskra króna.

  • Velta: 39.300 milljarðar
  • Hagnaður: 2.200 milljarðar
  • Eignir: 76.100 milljarðar
  • Starfsmenn: 671 þúsund

8. BP

British Petroleum er með starfsemi í 80 löndum og er mjög umsvifamikið á sviði olíu og gasvinnslu. Rekja má sögu félagsins aftur til ársins 1908 þegar Bretar hófu að bora eftir olíu í Íran. BP var framan af að mestu í ríkiseigu en var einkavætt á 8. og 9. áratugnum. Félagið er ábyrgt fyrir Deepwater Horizon olíulekanum í Mexíkóflóa árið 2010 en málið hefur kostað félagið 65 milljarða dollara, jafnvirði um 9.000 milljarða íslenskra króna.

  • Velta: 39.300 milljarðar
  • Hagnaður: 560 milljarðar
  • Eignir: 41.000 milljarðar
  • Starfsmenn: 73 þúsund

9. Amazon

Jeff Bezos stofnaði Amazon árið 1994 í bílskúr í úthverfi Seattle í Bandaríkjunum. Síðan þá hefur vöxtur Amazon verið ævintýralegur og gert Bezos, sem enn er forstjóri og stærsti hluthafi félagsins, að ríkasta manni heims. Félagið hefur notið góðs af heimsfaraldrinum þar sem heimsendingum hefur fjölgað til muna um heim allan. Amazon hefur fjölgað starfsmönnum um allt að 300 þúsund vegna faraldursins en markaðsvirði félagsins hækkaði yfir 80% á fyrstu mánuðum faraldursins.

  • Velta: 39.000 milljarðar
  • Hagnaður: 1 .600 milljarðar
  • Eignir: 31.300 milljarðar
  • Starfsmenn: 876 þúsund

10. Toyota Motors 

Japanski bílaframleiðandinn Toyota Motors framleiðir yfir 10 milljónir bíla á ári, og er sá næststærsti í heimi á eftir Volkswagen. Kiichiro Toyoda stofnaði fyrirtækið sem deild innan iðnfyrirtækis föður síns, Toyota Industries. Fjölskyldan hefur stýrt félaginu að miklu leyti síðan en Akio Toyoda, barnabarn Kiichiro, er forstjóri fyrirtækisins í dag. Það er með starfsemi um heim allan en um 80% af bílum fyrirtækisins eru seld utan Japan.

  • Velta: 38.200 milljarðar
  • Hagnaður: 2.650 milljarðar
  • Eignir: 67.700 milljarðar
  • Starfsmenn: 360 þúsund

Greinin birtist í bók Frjálsrar verslunar, 300 stærstu. Hægt er að tryggja sér eintak af bókinni hér.