Starfsemi Landsvirkjunar vex erlendis

Starfsemi Landsvirkjunar á erlendri grund hefur vaxið á síðustu árum, eða frá því að Landsvirkjun Power var sett á laggirnar árið 2008. Hlutafélagið, sem er í eigu Landsvirkjunar, heldur um erlenda starfsemi félagsins. Að sögn Björns Stefánssonar,yf i rverkf ræðings hjá LV Power, voru tekjur félagsins af erlendri starfsemi tvö síðustu ár um 260 milljónir hvort ár og útlit sé fyrir svipaðar tekjur í ár. Vöxturinn hefur verið nokkur frá stofnun en fyrsta starfsárið námu tekjur af erlendri starfsemi um 50 milljónum króna.

Enn sem komið er snýr starfsemin aðeins að ráðgjafarþjónustu sem veitt er öðrum orkufyrirtækjum. Mögulegt er að fjárfest verði erlendis í framtíðinni með batnandi efnahag Landsvirkjunar, segir Björn. Starfsmenn Landsvirkjunar Power hafa meðal annars unnið á Grænlandi, Panama, Filippseyjum, Kanada, Tyrklandi og Georgíu. Þegar Viðskiptablaðið ræddi við Björn var hann staddur í Nova Scotia í Kanada.

Nánar er fjallað um málið í sérblaðinu Orka og atvinnulíf sem fylgdi með síðasta tölublaði Viðskiptablaðsins. Áskrifendur geta nálgast blaðið hér að ofan undir liðnum Tölublöð.