Hæstiréttur hefur dæmt Stefán Kjærnested til að greiða Landsbankanum 50 milljónir króna vegna sjálfskuldarábyrgðar sem hann tókst á hendur bankanum vegna 80 milljóna króna láns Húsaleigu ehf., sem er í eigu Stefáns.
Landsbanki Íslands hf. og Húsaleiga ehf. gerðu samning í ágúst 2007 um fjölmyntalán að jafnvirði samtals kr. 80.000.000 í japönskum jenum og svissnenskum frönkum.
Sjálfskuldarábyrgð Stefáns takmarkaðist við 50 miljónir, auk vaxta, dráttarvaxta og kostnaðar. Fram kemur í dómi Hæstaréttar ekkert hafa verið greitt af láninu eftir 10. september 2008.
Hæstiréttur féllst ekki á að víkja sjálfskuldarábyrgð Stefáns til hliðar með vísan til 36. gr. laga um samningsgerð, umboð og ógilda löggerninga, en sú grein heimilar dómstólum að víkja samningi til hliðar í heild eða að hluta, eða breyta, ef það yrði talið ósanngjarnt eða andstætt góðri viðskiptavenju að bera hann fyrir sig.
Rétturinn féllst heldur ekki á að ábyrgðin félli niður vegna bráðabirgðaákvæða í lögum nr. 32/2009 um ábyrgðarmenn.
Stefán þarf að greiða 50 milljónir auk dráttarvaxta frá 17. október 2012.
