Stefanía Katrín Karlsdóttir hefur verið ráðin framkvæmdastjóri íþrótta-, heilsu- og heilbrigðisklasa Keilis, miðstöðvar vísinda, fræða og atvinnulífs. Þetta kemur fram á heimasíðu Keilis.
Stefanía var rektor Tækniháskóla Íslands frá 2002-2005 en hefur síðan verið bæjarstjóri í Árborg, starfað við fyrirtækjaráðgjöf hjá sparisjóðnum Byr og verið sjálfstætt starfandi rekstrarráðgjafi. Auk þess hefur hún setið í fjölmörgun nefndum, ráðum og stjórnum bæði í atvinnulífinu og á vegum hins opinbera. Stefanía er með háskólagráðu í raunvísindum og kennsluréttindi frá KHÍ auk MBA gráðu í viðskiptafræði og meistarargráðu í stjórnmálafræði frá HÍ.
Undir íþrótta-, heilsu- og heilbrigðisklasa Keilis fellur Íþróttaakademían en auk þess mun Stefanía leiða frekari uppbyggingu og þróun náms og rannsókna innan klasans í samstarfi við háskóla, fyrirtæki og stofnanir á þessu sviði.
Stefanía Katrín er í sambúð með Eiríki S. Svavarssyni lögmanni og á hún tvö börn.
