Starfs­manna­hópur Ankeri Solutions hefur tvö­faldast úr fimm í tíu manns frá því að hug­búnaðar­fyrir­tækið lauk 350 milljóna króna fjár­mögnun í haust sem leidd var af vísi­sjóðnum Frum­taki. Kristinn A. Aspelund, fram­kvæmda­stjóri Ankeri, segir að vísifjár­mögnunin sé mikil lyfti­stöng fyrir fyrir­tækið.

Ankeri býr til og þróar skýja­lausnir sem gera gáma­skipa­flutninga­fyrir­tækjum kleift að nálgast rekstrar­upp­lýsingar skipa á auð­veldan máta. Með lausninni geta eig­endur og leigj­endur skipa deilt gögnum og upp­lýsingum sín á milli sem stuðlar að bættri á­kvarðana­töku og betri orku­nýtingu.

„Við höfum komið upp upp­lýsinga­inn­viðum þar sem við­skipta­vinir geta tekið á­kvarðanir með rekjan­legu ferli byggðu á gögnum um hvaða skip eru hentugust fyrir sína flutninga. Það hefur vantað inn í á­kvörðunar­tökuna hvaða skip eyða mestri olíu. Það skiptir miklu máli, bæði út frá um­hverfis­sjónar­miðum en einnig vegna þess að olían getur verið helmingurinn af rekstrar­kostnaði skipa. Því er ekki alltaf hag­kvæmast að velja ó­dýrasta skipið í leigu­verði.“

Gögn um 15% gáma­skipa heims hafa farið í gegnum hug­búnað Ankeri en yfir hundrað fyrir­tæki hafa að­gang að lausnum fyrir­tækisins. Allar tekjur Ankeri koma er­lendis frá. „Það má í rauninni segja að Ham­borg sé okkar heima­markaður,“ segir Kristinn en þar eru flestir greiðandi við­skipta­vinir Ankeri í dag þó að öll starf­semin fari fram á Ís­landi. Í þýsku borginni er stærsti við­skipta­vinurinn Hapag-Lloyd, fimmta stærsta gáma­flutninga­út­gerð heims, en mikið af þeim á­huga sem lausnir Ankeri hafa fengið hefur sprottið úr þróunar­sam­starfi með út­gerðinni.

Tekjur fyrir­tækisins hafi vaxið nokkuð vel að sögn Kristins. Í hinum al­þjóð­lega flutninga­geira sé þó mikið um hefð­bundna sölu­mennsku sem vinnst maður á mann og því hefur Co­vid-far­sóttin hægt á sölu­starfinu. Með fjár­mögnuninni í haust hefur Ankeri fjár­fest í upp­byggingu á inn­viðum í sölu- og markaðs­starfi.

Enginn skortur á vaxtartækifærum

Kristinn, sem stofnaði Ankeri ásamt Leifi Kristjánssyni tæknistjóra árið 2016, segir að markmið Ankeri sé að tvöfaldast á ári hverju. Markaðurinn fyrir núverandi hugbúnaðarlausnir fyrirtækisins geti orðið hundrað milljóna dala virði. Til viðbótar séu „spin-off“ tækifæri fyrir nýjar lausnir sem gætu ef til vill orðið stærri að umfangi en þær lausnir sem Ankeri þróar í dag. Flutningamarkaðurinn hefur verið nokkuð í umræðunni vegna raskana á aðfangakeðjum í faraldrinum. Kristinn segir að það hafi verið áhugavert að fylgjast með stöðunni fyrir þá sem lifa og hrærast í þessum heimi.

„Þetta er iðnaður sem er ekki alltaf sýnilegur almenningi. Við sjáum hins vegar þegar á reynir hvað þetta er gríðarlega mikilvægur iðnaður fyrir heimsviðskipti eins og þau eru sett upp í dag. Um 90% af öllum vörum í heiminum eru flutt með skipum.“

Spurður um hvernig grænu orkuskiptin gangi í þessum geira þá segir Kristinn að þau séu enn á byrjunarreit. Þörf sé á töluverðri fjárfestingu í þróun á tækni ásamt uppbyggingu á innviðum og framleiðslu á rafeldsneyti til að styðja við tilfærsluna í græna orku. Hins vegar hafi stór skref verið tekin að undanförnu og bendir hann á að skipafélagið Maersk hafi ákveðið að hefja smíði á flutningaskipum sem nota metanól sem orkugjafa.

Heppin með tímasetningu

Kristinn segir að fjárfestingarumhverfið fyrir nýsköpunarfyrirtæki hafi reynst Ankeri vel. Fyrst hafi fyrirtækið fengið fjármagn frá reyndum frumkvöðlum og árið 2018 fjárfesti svo Nýsköpunarsjóður atvinnulífsins í fyrirtækinu. Í haust lauk Ankeri 350 milljóna króna fjármögnun, sem var leidd af vísisjóðnum Frumtaki 3, en fyrri hluthafar tóku einnig þátt. „Þessari fjárfestingu fylgir heilmikil reynsla,“ segir Kristinn.

Í stjórn Ankeri sitja fulltrúar frá Frumtaki og Nýsköpunarsjóði ásamt Hermanni Kristjánssyni, stofnanda Vaka, sem hefur einnig fjárfest í fyrirtækinu.

Kristinn segir að það hafi verið ákveðin heppni að á sama tíma og Ankeri var tilbúið í að taka næsta skref í vexti þá séu vísisjóðir nú tilbúnir með fjármagn. Hann bindur vonir við að þegar vísisjóðirnir sem nýverið hafa verið settir á fót verða komnir lengra inn í fjárfestingatímann að þá muni nýir sjóðir taka við keflinu svo að ákveðin samfella myndist.

„Ég tel að það sé mikilvægt fyrir samfélagið ef okkur tekst að halda uppi öflugu fjárfestaumhverfi sem hefur alltaf bolmagn til að styðja við vaxtafyrirtæki sem nota íslenskt hugvit til að sækja skalanlegar gjaldeyristekjur. Ef það tekst þá verðum við með mjög spennandi atvinnulíf hérna.“

Nánar má lesa um málið í Viðskiptablaðinu sem kemur út á morgun. Áskrifendur geta nálgast blaðið undir Tölublöð , aðrir geta skráð sig í áskrift hér .