*

fimmtudagur, 9. apríl 2020
Fólk 18. desember 2019 14:06

Steingrímur frá Högum til Samherja

Skrifstofa Samherja í Hollandi hefur fengið nýjan fjármálastjóra, Steingrím H. Pétursson. Einnig verið hjá Olís og Eimskip.

Ritstjórn
Steingrímur H. Pétursson hefur flutt sig frá Högum, sem tóku yfir Olís þar sem hann starfaði áður, til Samherja, og verður hann fjármálastjóri á skrifstofu félagsins í Hollandi.

Steingrímur H. Pétursson hefur verið ráðinn fjármálastjóri á skrifstofu Samherja í Hollandi. Steingrímur hefur fjölþætta reynslu úr íslensku viðskiptalífi og býr yfir mikilli sérþekkingu á fjármálum.

Steingrímur kemur til Samherja frá Högum þar sem hann gegndi stöðu framkvæmdastjóra fjármála- og viðskiptaþróunar en þar á undan var hann framkvæmdastjóri fjármálasviðs Olís um þriggja ára skeið.

Steingrímur hefur einnig gegnt stöðu framkvæmdastjóra hjá Eimskip, Sandblæstri og Málmhúðun og Fjárfestingarfélaginu Sjöfn en hóf starfsferil sinn að loknu háskólanámi hjá KPMG Endurskoðun á Akureyri þar sem hann vann í fjögur ár.

Steingrímur er með meistaragráðu í viðskiptafræði frá Háskólanum á Akureyri og B.Sc. gráðu í viðskiptafræði frá Háskóla Íslands. Hann er kvæntur Lindu Björk Sævarsdóttur og eiga þau þrjú börn.