*

sunnudagur, 28. nóvember 2021
Erlent 3. nóvember 2020 15:29

Stöðva stærsta frumútboð sögunnar

Ant Group hyggst endurgreiða þeim fjárfestum sem tóku þátt í frumútboði félagsins. Hlutabréf Alibaba hafa lækkað um 6%.

Ritstjórn
Jack Ma er stærsti hluthafi Ant Group sem og stofnandi Alibaba.
epa

Hlutafjárútboð fjártæknirisans Ant Group hefur verið stöðvað en um er að ræða stærsta útboð sögunnar. Kauphöll Shanghæ hefur tilkynnt að útboðinu verði frestað vegna breytinga á regluverki. Viðskipti með bréfin áttu að hefjast 5. nóvember næstkomandi.

Jack Ma, leiðandi hluthafa í Ant Group og stofnandi Alibaba, og aðrir stjórnendur fóru á fund með eftirlitsstofnunum. Ekki er ljóst hvað fór fram á fundinum, að því sem WSJ segir frá. Félagið hugðist safna alls 34,4 milljörðum Bandaríkjadala í frumútboðinu sem hefði verið það stærsta í sögunni.

Ant Group hefði verið skráð í kauphöll Shanghæ og kauphöll Hong Kong en núna hyggst það endurgreiða þeim fjárfestum sem tóku þátt í útboðinu. Í kjölfar fregnanna hafa hlutabréf í Alibaba, sem á þriðjungshlut í Ant Group, lækkað um rúmlega sex prósent. Ant Group heldur utan um greiðslulausnina Alipay sem um 700 milljón manns nota daglega.