Frumvarp Lilju Alfreðsdóttur utanríkisráðherra um þjóðaröryggisráð var í dag samþykkt á Alþingi mótatkvæðalaust.
Auk þess að vera samráðsvettvangur um þjóðaröryggismál er ráðinu meðal annars ætlað að hafa eftirlit með framkvæmd þjóðaröryggisstefnu sem Alþingi samþykkti fyrr á árinu fyrir Ísland.
Á það að meta ástand og horfur í öryggis- og varnarmálum og fjalla um önnur málefni sem varða þjóðaröryggi.
Fulltrúar meiri- og minnihluta auk ríkisstjórnar, öryggisstofnana og Landsbjargar
Í ráðinu eiga fast sæti forsætisráðherra, sem formaður ráðsins, utanríkisráðherra, innanríkisráðherra og ráðuneytisstjórar ráðuneytanna þriggja.
Auk þeirra eiga tveir þingmenn fast sæti, annar úr þingflokki sem tilheyrir meirihluta á þingi, hinn úr þingflokki minnihluta. Einnig sitja í ráðinu forstjóri Landhelgisgæslunnar, ríkislögreglustjóri og fulltrúi Landsbjargar. Þess utan getur ráðið kallað aðila til tímabundinnar setur í ráðinu vegna einstakra mála.
Breið pólítísk samstaða
„Ég er stolt af því að smiðshöggið hafi verið rekið á þetta mikilvæga verk með breiðri pólitískri samstöðu. Fjórir utanríkisráðherrar í þremur ríkisstjórnum hafa komið að því starfi með dyggri leiðsögn þingsins á hverjum tíma. Við byggjum því á traustum grunni í þeirri vegferð sem framundan er," segir Lilja, en stofnun ráðsins á upphaf sitt að rekja til ársins 2009 þegar nefnd skipuð af Ingibjörgu Sólrúnu Gísladóttur skilaði áhættumatsskýrslu fyrir Ísland.
„Þetta eru söguleg tíðindi. Í fyrsta skipti í sögu lýðveldisins er til staðar þjóðaröryggisstefna og þjóðaröryggisráð sem horfir með heildstæðum hætti á öryggismál og þær margbreytilegu áskoranir sem við stöndum frammi fyrir. Frumvarpið tók jákvæðum breytingum í meðförum þingsins og það er sérstaklega ánægjulegt að frumvarpið sé afgreitt í breiðri sátt á Alþingi og afar þýðingarmikið þegar um slíkt grundvallarmál er að ræða."
Á að beita sér fyrir opinni umræðu um málefnið
Þjóðaröryggisráði er jafnframt ætlað, í samvinnu við háskólasamfélagið, hugveitur og fjölmiðla að beita sér fyrir opinni og lýðræðislegri umræðu um þjóðaröryggismál.
Mun ráðið upplýsa Alþingi um framkvæmd stefnunnar á hverju ári og utanríkismálanefnd þingsins um hver þau mál sem líkleg eru til að hafa áhrif á þjóðaröryggisstefnuna og framkvæmd hennar.