„Stressaður aðstoðarmaður orðinn of seinn á fund fékk tiltal og sekt fyrir of þungan bensínfót í Mosfellsdalnum,“ segir Jóhannes Þór Skúlason, aðstoðarmaður Sigmundar Davíðs Gunnlaugssonar, formanns Framsóknarflokksins. Sigmundur tekur við af Jóhönnu Sigurðardóttur sem forsætisráðherra nýrrar ríkisstjórnar Framsóknarflokks og Sjálfstæðisflokks á morgun. Lögreglan á höfuðborgarsvæðinu stöðvaði bíl Jóhannesar í Mosfellsdalnum eftir hádegi í dag þar sem hann var á leið frá Laugarvatni með Sigmund sér við hlið. Á Laugarvatni í morgun skrifaði Sigmundur Davíð undir nýjan stjórnarsáttmála með Bjarna Benediktssyni, formanni Sjáflstæðisflokksins.
Jóhannes segir á Facebook-síðu sinni bílinn hafa verið á 106 kílómetra hraða þegar lögreglan stöðvaði hann.
Haraldur Guðjónsson, ljósmyndari Viðskiptablaðsins, náði mynd af atvikinu. Ef rýnt er í myndina má sjá Sigmund Davíð sitja í farþegasætinu og tala í síma.
© Haraldur Guðjónsson (VB MYND/hag)
