Stríðið í Úkraínu hefur ekki haft jafnmikil áhrif á rekstur Lýsis og félagið óttaðist eftir innrás Rússa í lok febrúar. Útflutningsfyrirtækið gerir þó ráð fyrir að um 200-300 milljóna króna velta tapist og framlegð lækki um 70-105 milljónir í ár vegna stríðsins, að því er kemur fram í nýbirtum ársreikningi félagsins.

Til samanburðar þá sagði Katrín Pétursdóttir, forstjóri Lýsis, í samtali við Viðskiptablaðið í byrjun mars að fyrirtækið gæti orðið af hátt í 700 milljónir króna í ár þar sem viðskiptaþvinganir stöðvuðu nær alfarið útflutning Lýsis til Rússlands.

„Við erum búin að leggja gríðarlega vinnu í að byggja upp okkar vörumerki í Rússlandi. Við eigum í samstarfi við stóra apótekakeðju í Rússlandi sem hefur ásamt okkur kostað miklu til í þessu starfi. Maður horfir á þetta eiginlega fara ofan í vaskinn,“ sagði Katrín.

Sjá einnig: Högg fyrir Lýsi að missa Rússlandsmarkað

Áætlanir Lýsis gerðu ráð fyrir um 750 milljónir í tekjur af útflutningi til Rússlands í ár. Í skýrslu stjórnar í ársreikningum, sem var undirrituð 24. maí síðastliðinn, segir að sala til Rússlands í ár hafi numið um 78 milljónum fram að innrásinni en þar af séu um 41 milljónir útistandandi.

Stjórnin segir einnig að þegar séu komnar fram miklar hækkanir á nánast öllum aðföngum sökum skorts á hráefnum í helstu umbúðir. Hækkanir á aðföngum, sem megi rekja til stríðsins, séu að meðaltali um 20%. Þá hafi hrálýsisverð hækkað um allt að 40%. Auk þess hafi flutningskostnaður hækkað mikið sem gerir allan útflutning „mun dýrari“ en áður.