*

föstudagur, 30. október 2020
Innlent 26. ágúst 2020 08:55

Stýrivextir óbreyttir í 1%

Seðlabanki Íslands hefur ákveðið að halda stýrivöxtum óbreyttum.

Ritstjórn
Ásgeir Jónsson er seðlabankastjóri og formaður peningastefnunefndar.
Haraldur Guðjónsson

Peningastefnunefnd Seðlabanka Íslands hefur ákveðið að halda vöxtum bankans óbreyttum. Meginvextir bankans, vextir á sjö daga bundnum innlánum, verða því áfram 1%. Vextir bankans hafa aldrei verið jafn lágir en þeir stóðu í 2,75% í upphafi árs og 4,5% í apríl á síðasta ári.

Samkvæmt nýrri þjóðhagsspá Seðlabankans sem birt er í ágústhefti Peningamála eru horfur á að landsframleiðslan dragist saman um 7% í ár og útlit er fyrir að atvinnuleysi verði komið í um 10% undir lok ársins. Þetta er minni samdráttur en hafði verið gert ráð fyrir í maí. Þar vegur þyngst að einkaneysla var kröftugri í vor og sumar.

 Samkvæmt spá Seðlabankans er gert ráð fyrir að verðbólga verði í kringum 3% það sem eftir lifir árs. Því er spáð að hún muni hjaðna á næsta ári vegna slaka í þjóðarbúinu auk lágri alþjóðlegri verðbólgu.

Klukkan 10:00 á eftir hefst vefútsending þar sem greint verður nánar frá yfirlýsingu peningastefnunefndar, vaxtaákvörðunar og Peningamála sem birtist rétt í þessu. Að öllu óbreyttu mun næsta vaxtaákvörðun fara fram 7. október næstkomandi.