Peningastefnunefnd Seðlabanka Íslands hefur ákveðið að halda vöxtum bankans óbreyttum. Stýrivextir verða því áfram 0,75%. Hagfræðideild Landsbankans sem og greiningardeild Íslandsbanka höfðu spáð óbreyttum vöxtum.

Í yfirlýsingu nefndarinnar segir að eftirspurn hafi verið þróttmeiri, og efnahagssamdráttur því minni, en gert var ráð fyrir í nóvember. Gert sé ráð fyrir að eftirspurn vaxi hraðar á þessu ári en á hafði horfst í nóvember, en á móti séu innflutningshorfur lakari.

Bent er á að gengislækkun krónunnar vegi þungt í þeirri 4,3% verðbólgu sem nú mælist, auk þess sem heimsmarkaðsverð olíu og hrávöru hafi hækkað. Verðhækkanir innlendrar vöru endurspegli þó einnig þrótt innlendrar eftirspurnar.

Bankinn spáir 3,9% verðbólgu á fyrsta ársfjórðungi, en að hún hjaðni hratt eftir það, enda slaki hagkerfisins enn töluverður og gengið verið að styrkjast.

Í spá sinni um óbreytta stýrivexti benti Hagfræðideild Landsbankans á að lítið svigrúm sé til að lækka vexti, enda þegar orðnir sögulega lágir. Aðgerðir bankans muni því í frekari mæli felast í kaupum á ríkisskuldabréfum, sem hafi verið lítil í fyrra, en tekið við sér undir lok ársins. Ásgeir Jónsson Seðlabankastjóri sagði á peningamálafundi Viðskiptaráðs í nóvember í fyrra að árið í ár yrði „ár preningaprentunar“.

Yfirlýsing nefndarinnar í heild sinni:

Peningastefnunefnd Seðlabanka Íslands hefur ákveðið að halda vöxtum bankans óbreyttum. Meginvextir bankans, vextir á sjö daga bundnum innlánum, verða því áfram 0,75%.

Samkvæmt nýrri þjóðhagsspá Seðlabankans sem birt er í febrúarhefti Peningamála virðist innlend eftirspurn hafa verið þróttmeiri í fyrra en áður var áætlað og efnahagssamdrátturinn því verið minni en bankinn spáði í nóvember. Á þessu ári eru einnig horfur á að innlend eftirspurn vaxi meira en áður var spáð en á móti vega lakari útflutningshorfur. Þróun efnahagsmála mun þó markast af framvindu farsóttarinnar.

Verðbólga jókst í janúar þegar hún mældist 4,3%. Hér vega enn þungt áhrif gengislækkunar krónunnar á verð innfluttrar vöru. Á sama tíma hefur verð innlendrar vöru einnig hækkað sem endurspeglar að einhverju leyti þrótt innlendrar eftirspurnar. Þá hefur alþjóðlegt olíu- og hrávöruverð hækkað og við bætast óhagstæð grunnáhrif frá janúar í fyrra. Samkvæmt spá Seðlabankans eru horfur á að verðbólga verði um 3,9% á fyrsta fjórðungi ársins en að hún hjaðni tiltölulega hratt er líður á árið enda töluverður slaki til staðar í þjóðarbúinu og gengi krónunnar hefur hækkað undanfarna mánuði.

Peningastefnunefnd mun beita þeim tækjum sem nefndin hefur yfir að ráða til að styðja við þjóðarbúskapinn og tryggja að verðbólga hjaðni aftur í markmið innan ásættanlegs tíma.