„Sveitarfélög á okkar markaðssvæðum styðja við sjóðinn og það skiptir miklu máli í endurreisn hans,“ segir Einar Hannesson, sparisjóðsstjóri Spkef. Líkur standa til þess að efnahagsreikningur Spkef verði endanlega klár um næstu mánaðamót. Íslenska ríkið mun leggja sjóðnum til eigið fé svo að hann uppfylli skilyrði FME um 16% CAD-eiginfjár hlutfall. Ekki liggur fyrir enn hversu há upphæðin verður sem ríkið mun þurfa að leggja sjóðnum til. Samkvæmt heimildum Viðskiptablaðsins verður hún á bilinu 14 til 20 milljarðar.
Sparisjóður að nafninu til
Innlán sjóðsins eru umtalsverð en útlánasafnið aftur á móti lélegt. Hátt eiginfjárframlag ríkisins til sjóðsins skýrist öðru fremur af því. Samtals eru innlán sjóðsins á bilinu 55 til 60 milljarðar króna. Þar af munar miklu um það að sveitarfélögin á Suðurnesjum hafa nær öll haldið tryggð við sjóðinn og haft fé sitt þar í ávöxtun, þrátt fyrir þær hremmingar sem sjóðurinn hefur gengið í gegnum. Þar ber hæst fall sjóðsins, þá Sparisjóðs Keflavíkur, í apríl 2010 en eignir og skuldbindingar sjóðsins voru færðar á nýja kennitölu í kjölfarið, undir nafni Spkef.
Samkvæmt heimildum Viðskiptablaðsins er líklegt að nafni sjóðsins verði breytt þegar endurreisninni lýkur formlega, enda ljóst að nýr sparisjóður mun eiga fátt sameiginlegt með þeim gamla. Hann verður að nafninu til sparisjóður en eigandi alls stofnfjárins verður ríkið. Stofnfjáreign verður því ekki dreifð á markaðssvæði sjóðsins eins og er raunar grundvallarhugmyndin að baki sparisjóða.
Nánar er fjallað um málið í nýjasta tölublaði Viðskiptablaðsins. Áskrifendur geta nálgast blaðið hér að ofan undir tölublöð