Gengi Síldarvinnslunnar (SVN) endaði í 65,2 krónum á hlut í 1,1 milljarðs króna veltu á fyrsta dag viðskipta með hlutabréf félagsins á aðalmarkaði Nasdaq. Endanlegt útboðsgengi í útboði SVN var 60 krónur á hlut í tilboðsbók B (tilboð yfir 20 milljónum króna) og 58 krónur í tilboðsbók A (undir 20 milljónum). Hlutabréfaverð Síldarvinnslunnar er því um 8,6%-12,4% yfir útboðsgenginu.
Sjá einnig: SVN hringt inn í skipinu Berki
Úrvalsvísitalan lækkaði um 0,3% í 6,9 milljarða króna veltu en fjórtán af nítján félögum lækkuðu í viðskiptum dagsins. Icelandair lækkaði um 3%, mest allra félaga, en gengi flugfélagsins stendur nú í 1,60 krónum á hlut. Brim lækkaði næst mest eða um 1,8% en sjávarútvegsfélagið hefur engu að síður hækkað um 14% frá 11. maí síðastliðnum.
Mesta veltan var með hlutabréf Arion banka sem lækkuðu um 0,7% í 2,2 milljarða króna viðskiptum. Gengi Arion hefur engu að síður hækkað um 44% í ár, mest allra félaga Kauphallarinnar.
