*

föstudagur, 24. september 2021
Innlent 10. mars 2021 16:18

Taka tvær nýjar fraktvélar í rekstur

Icelandair selur og endurleigir tvær Boeing 767 farþegavélar sem síðar verður breytt í fraktvélar.

Ritstjórn
Aðsend mynd

Í dag skrifaði Icelandair Group undir samning um sölu og endurleigu á tveimur Boeing 767-300ER farþegaflugvélum við bandaríska flugvéluleigusalann Titan Aircraft Investments, en vélunum verður síðar breytt í fraktvélar. Vélarnar verða fyrst um sinn nýttar í farþegaflugi hjá Icelandair og í leiguflugi hjá Loftleiðum en verður breytt í fraktvélar vorið 2022 og teknar í rekstur hjá Icelandair Cargo haustið 2022. Þetta kemur fram í fréttatilkynningu frá Icelandair.

„Er þeim ætlað að leysa af hólmi eldri fraktvélar félagsins en félagið áætlar að taka tvær Boeing 757-200 fraktvélar sínar úr rekstri 2023 og 2024. Samningurinn er til 10 ára og hefur jákvæð áhrif á lausafjárstöðu Icelandair Group,“ segir í tilkynningu Icelandair.

Félagið muni áfram leggja áherslu á að nýta farþegaleiðakerfi Icelandair fyrir fraktflutninga og þannig bjóða þjónustu á fjölmarga áfangastaði beggja vegna Atlantshafsins, til viðbótar því að sækja á markaði með þessum nýju sérútbúnu Boeing 767-300 breiðþotum.

„Við sjáum mikil tækifæri til sóknar í fraktflutningum á okkar helstu mörkuðum með því að bæta þessum öflugu fraktvélum við flotann okkar. Um er að ræða tvær Boeing 767 breiðþotur sem bera hvor um sig rúmlega 50% meira af frakt en núverandi floti okkar og henta vel inn í leiðakerfi félagsins.

Fraktflutningar hafi gengið vel undanfarið ár þrátt fyrir kórónuveirufaraldurinn og horfur eru áfram góðar. Útlit er fyrir að verkefnum hér á Íslandi muni fjölga og við sjáum jafnframt tækifæri í því að styrkja Ísland sem tengimiðstöð fyrir fraktflutninga milli heimsálfa, á svipaðan hátt og við höfum gert í farþegaflugi Icelandair í áratugi," er haft eftir Boga Nils Bogasyni, forstjóra Icelandair Group, í tilkynningunni.

„Við teljum að það verði mikil eftirspurn eftir fraktflugi á Atlantshafsmarkaðinum, bæði til skemmri og lengri tíma, sem við ætlum að sinna. Breiðþoturnar auka sveigjanleika félagsins og munu gera okkur kleift að sækja fram á þessum markaði á hagkvæmari hátt en áður, efla þjónustu við viðskiptavini okkar og starfsemi Icelandair Cargo til framtíðar," segir Gunnar Már Sigurfinnsson, framkvæmdastjóri Icelandair Cargo, í tilkynningunni.